O'zbekiston terma jamoasi sobiq bosh murabbiyi Valeriy Nepomnyashiy yarim himoyachi Odil Ahmedovning "Krasnodar"dan "Shanxay"ga ketishi haqida fikr bildirdi.
- Odil Ahmedov Rossiya chempionatidan ketdi. 2006 yilda u aynan sizning qo'l ostingizda "Paxtakor"da o'ynay boshlagan edi...
- Bu ma'lumotni qaerdan oldingiz? Bu kimgadir ma'lum deb o'ylamas edim. Umuman, o'shanda u hozirgidan ko'ra kattaroq natijaga erishadi, deb o'ylagan edim. U juda katta saviyadagi o'yinchi, deb hisoblaganman. Afsuski Odil Evropaga emas, Xitoyga yo'l oldi. Ammo boshqa tomondan bu holat uning uchun u qadar yomon ham emas.
- "Paxtakor"da u qanday o'ynagani haqida so'zlab bersangiz.
- Bilasizmi, u 18 yoshlik chog'idayoq maydonda xuddi o'ttiz yoshdan oshib ketgan o'yinchidek harakat qilardi. Hamma narsani bilardi va qo'lidan hamma narsa kelardi. Shu bilan birga hayotda ancha kamtar, xotirjam va uyatchan yigit edi. Biroq maydonga tushgani hamono butkul o'zgarardi. Odilga qo'lidan kelgan ishni bajarishni qo'yib berish kerak edi. Uning potentsiali o'sha vaqtlardayoq ko'rinib turgandi. Shu sababli uning porlashida mening hech qanday xizmatim yo'q. Yodimda, o'shanda ikki iqtidorli futbolchi paydo bo'lgandi - Odil Ahmedov va Vitaliy Denisov. Ular O'zbekiston terma jamoasida katta ahamiyat kasb etishardi. Ba'zi futbolchilarga o'zini ko'rsatishi uchun murabbiyning so'zlari shart emas. Ammo Odilni qo'llab-quvvatlab turish lozim. U qo'pol o'yinchi emas va hech qachon gap qaytarmagan. Ammo yuksak marralarni zabt etish uchun qat'iyroq bo'lish kerak bo'ladi.
- Odil o'z potentsialini ochib bera olmadimi?
- Yo'q, ochib bera olmadi. U bundan ko'prog'iga qodir edi, deb o'ylayman. Ammo u Rossiya chempionatidagi faoliyatini yaxshi o'tkazdi. U bilan birga ishlagan istalgan murabbiydan so'rang, unga nisbatan e'tirozi bormikan? Odil yuqori darajadagi professional va jamoaviy futbolchi. "Krasnodar"da undan qanot futbolchisi sifatida foydalanishdi, aslida esa u tayanch yarim himoyachisi edi. "Anji"da yulduzlar orasida o'ynadi va "Krasnodar"da ham o'zini ko'rsata oldi.
- U qaerda potentsialini to'liq ochib bergan bo'lardi?
 - Evropada!
- Ahmedovni o'yin saviyasi bo'yicha kim bilan tenglashtira olasiz?
- Bilasizmi, faqat kuchsiz futbolchilarni boshqalar bilan tenglashtiradilar. U esa - Odil Ahmedov! Shu bilan hamma gapni aytib bo'ldim.
- Ahmedov o'z pozitsiyasida Rossiya chempionatining eng yaxshi o'yinchisi edimi?
- Yo'q, bunday demagan bo'lardim. Oxirgi bir yarim yilda uning ishlari u qadar yurishmadi. Har doim ham asosiy tarkibda o'ynamadi.
- Shunday ekan, Xitoy chempionati - faoliyatni yakunlash sari tashlangan qadammi?
- Yo'q, yo'q, yo'q. Bu gapni unga nisbatan aytib bo'lmaydi. Odil mentalitet jihatidan Xitoy futboliga ancha yaqin. Unga kim tavsiya qilgan bilmadimku, ammo Odil Xitoy chempionatida o'z o'yinidan zavqlanishi mumkin. U erda biz o'ylagandek  u qadar yomon emas. Agar o'z oldiga jiddiy maqsad qo'ygan klubda o'ynaydigan bo'lsang, demak hammasi joyida.
- Odil Ahmedov ketgan jamoa bosh murabbiyi - Andre Villash Boash. Yana u erda Xalk to'p suradi. Bu futbolchilar bir klubda o'ynashi kutilganmidi?
- Albatta. Albatta ularni Rossiya chempionatida bir jamoada o'ynashlarini istagan bo'lardim. Ammo taqdir ekan...

— deya xabar beradi uff.uz nashri.