Bir necha kun avval Rossiyaning “Krasnodar” klubidan “Shanxay SIPG” jamoasiga o'tgan O'zbekiston milliy terma jamoasi sardori Odil Ahmedov Xitoyga etib bordi. “Shanxay SIPG” a'zosiga aylangan Odil Ahmedov Xitoyga etib bordi 29 yoshli yarim himoyachi “Shanxay SIPG” vakillari va OAV xodimlari tomonidan iliq kutib olindi. Odil Ahmedov Xitoy klubi bilan 3 yillik shartnomaga imzo chekdi. O'zbekiston terma jamoasi sardori “Shanxay SIPG”da portugaliyalik mutaxassis Andre Villash-Boash qo'li ostida to'p suradi. Ahmedov yangi jamoasida braziliyalik futbolchilar Xalk, Oskar va Elkesen, argentinalik Dario Konka, ivuarlik Jan Edvard Kuassi kabi tajribali va mahoratli futbolchilar bilan birgalikda o'ynaydi. Ma'lumot o'rnida, Odil Ahmedov 2006 yili professional faoliyatini boshlagan bo'lib, 2006–2011 yillar davomida “Paxtakor” sharafini himoya qilgan. U ikki karra O'zbekiston chempioni (2006, 2007), uch karra O'zbekiston Kubogi sohibi (2006, 2007, 2009) hamda Hamdo'stlik mamlakatlari Kubogi (2007) g'olibi bo'lgan. 2011–2014 yillarda tajribali yarim himoyachi Maxachqal'aning “Anji” klubida to'p surdi. 2011 yilda u jamoaning eng yaxshi futbolchisi deb topilgandi. 2014–2016 yillarda o'zbekistonlik futbolchi “Krasnodar” jamoasida o'ynadi. 2014/15 yilgi mavsumda u “buqalar”ning eng yaxshi futbolchisi deb tan olingandi. Odil Ahmedov faoliyati davomida 4 marta – 2009, 2011, 2014 va 2015 yillarda O'zbekistonning eng yaxshi futbolchisi nomiga sazovor bo'lgandi.
— deya xabar beradi uff.uz nashri.