"Sport" telekanalining "Sokker klub" ko'rsatuvining yangi soni kelishilgan o'yinlarga qarshi kurashga qaratildi. Ushbu ko'rsatuv doirasida O'FF qoshidagi "Kelishilgan o'yinlarga qarshi kurash" qo'mitasi rahbari Ahrol Inoyatovdan ham intervyu olingan.
- Kelishilgan o'yinlarni aniqlovchi mutaxassislar guruhidan kimlar o'rin olganini nomma-nom sanab bera olasizmi?
- Ha, albatta, ular - Samvel Babayan, Igor Shkvirin, Sardor Rahmatullaev, Farhod Magometov, Baxtiyor Boboev, Ravshan Ermatovlar.
- Siz aytgan mana shu insonlar orasida kelishilgan o'yinlarda ishtirok etganlar yo'qligiga kafolat bera olasizmi?
- Agar kimdir o'z nomiga dog' tushirgan bo'lsa, ular safimizdan o'chiriladi. Masalan ilgari mutaxassislar guruhida Rustam Mirsodiqov ham bor edi, ammo uni hozir chetlatganmiz.
- Demak shu vaqtgacha bo'lgan oraliqda bir kishi shubhali o'yinlarda ishtirok etishga ulgurib ham qo'ygan.
- Ha.
Eslatib o'tamiz, O'FF prezidenti Mirabror Usmonov joriy mavsum boshlanishi oldidan kelishilgan o'yinlarda ishtirok etganlar qattiq jazolanishini aytgan edi. O'z navbatida 2015 yilning 25 sentyabrida bo'lib o'tgan "Paxtakor" - "Metallurg" o'yini (3:2) shubhali deb topilgan va "Metallurg" bosh murabbiyi Rustam Mirsodiqov mavsum oxiriga qadar futboldan chetlatilgan. O'FF prezidenti  Mirabror Usmonov "Paxtakor" klubiga nisbatan mavsum oxirida qat'iy jazo choralani ko'rilishini va'da qilgan edi.
— deya xabar beradi uff.uz nashri.