O'zbekiston chempionatining  barqaror jamoalaridan biri, 2016 yilgi mavsumda turnir jadvalining 7-pog'onasidan o'rin olgan Bekobodning «Metallurg» klubi  ayni vaqtda  oliy liganing boshqa ishtirokchilari singari navbatdagi mavsumga qizg'in tayyorgarlik ko'rmoqda.  Jamoaning yakunlangan mavsumda qayd etgan natijalari, yangi mavsum uchun tuzilayotgan rejalar haqida batafsil ma'lumot olish maqsadida jamoa boshlig'i Shavkat Saidovni suhbatga chorladik. — Shavkat aka, avvalo,  «Metallurg»ning 2016 yilgi bahslardagi ishtiroki haqida fikr bildirsangiz. Mavsum arafasida klub rahbariyati tomonidan jamoaga qanday vazifalar qo'yilgan edi-yu, ularni amalga oshirish darajasi qanaqa bo'ldi? —  Tan olib aytish joiz, bu yilgi mavsum oldingilariga nisbatan murosasiz o'yinlar, tengma-teng bahslarga boy o'tgani bilan alohida yodda qoldi. Sovrinli o'rinlar uchun 2-3 ta emas, balki 7-8 ta jamoa kurash olib bordi. Turnirning quyi pog'onalarini o'rin olib turgan jamoalar kutilmaganda  peshqadam  klublardan ochko olib qo'yish holatlari ko'p bora qayd etildi. Jamoamiz futbolchilari ham o'zlaridagi bor imkoniyat va mahoratlarini ishga solgan holda yaxshi natijalarni ko'rsatish uchun harakat qildilar. Ammo ba'zi uchrashuvlarda kuchni to'g'ri taqsimlay olmaganimiz bois,  bemavrid ochko yo'qotdik. Shunday bo'lsa-da, yil boshida jamoa oldiga qo'yilgan vazifa -  oltinchi-o'ninchi o'rinlar oralig'idan joy egallash burchi muvaffaqiyatli ado etildi.  Eng muhimi, chiroyli, hujumkor o'yin namoyish etib, muxlislarimizni xursand etdik. Chempionat to'purarlari ro'yxatida ikkinchi pog'onadan joy egallagan Zohid Abdullaev klub rekordini yangiladi. Tajribali hujumchimiz, shuningdek, O'zbekiston milliy terma jamoasiga chaqirildi.  Yana ikki nafar iste'dodli  futbolchimiz — Islomjon Qobilov va Javohir Esonqulovlar Jasur Abduraimov boshchiligidagi 19 yoshgacha bo'lgan yoshlar terma jamoasi safida Osiyo  chempionati bahslarida ishtirok etib qaytdi. Bundan tashqari, yakunlangan mavsumda «Metallurg» Rustam Mirsodiqov jamoaga bosh murabbiy etib tayinlanganidan buyon,  ya'ni 2008 yildan beri mavsum davomida eng ko'p — 49 ochko yig'ishga muvaffaq bo'ldi. Bungacha bu boradagi eng yaxshi ko'rsatkich 42 ochkoga teng edi. Shu bois ham rahbariyatning jamoa qayd etgan natijalaridan ko'ngli to'ldi. Mavsum yakunlanishi munosabati bilan poytaxtdagi mo''jaz restoranlardan birida dasturxon yozilib, jamoaning barcha a'zolariga minnatdorlik bildirildi. Qishki ta'til oldidan futbolchilarga oylik maoshlar, va'da qilingan mukofot pullari topshirildi. Xullas, «Metallurg» 2016 yilgi mavsumni yaxshi kayfiyatda yakunladi.        — Statistikaga murojaat qilsak, «Metallurg» birinchi davrada ikkinchi davraga nisbatan yaxshiroq natijalarni qayd etganini ko'rishimiz mumkin. Xususan, dastlabki uchta o'yinda ketma-ket g'alaba qozongan jamoa iyun oyida o'tkazilgan  to'rtta uchrashuvning har birida qimmatli ochkolarni qo'lga kiritdi. Shu  bois ham, iyun oyi yakunlari bo'yicha o'tkazilgan so'rov natijalariga ko'ra, Rustam Mirsodiqov va Zohid Abdullaev eng yaxshilar qatoridan o'rin oldi. Sentyabr va oktyabr oylari esa aksincha, jamoa uchun omadsiz keldi. Bunday holatning yuzaga kelishiga, sizningcha, nima sabab bo'ldi? — Bu savolingizga birinchi javobni taqvimdan olishingiz mumkin. Zero, siz aytgandek, jamoamiz uchun omadli kelgan  iyun oyida ketma-ket ikkita o'yinni qur'aga muvofiq, o'z maydonimizda o'tkazgandik. Ya'ni «Andijon» (3:1) va «Bunyodkor» (1:1) futbolchilari Bekobodga kelgandi. Tabiiyki, ikkinchi davrada ana shu raqiblarga qarshi o'yinlarni ketma-ket safarda o'tkazdik. «Andijon»ga qarshi o'tkazilgan uchrashuvda darvozalar daxsizligi saqlanib qolingan bo'lsa, «Bunyodkor»ga kichik hisobda imkoniyatni boy berdik.  Ikkinchidan, aynan sentyabr oyida jamoamizning mavsumdagi eng alamli mag'lubiyati qayd etildi.  «Buxoro»ga qarshi o'tkazilgan uy uchrashuvi to'liq «Metallurg» ustunligida o'tgan, o'yindagi hisobni ham  vakillarimiz  ochgan bo'lsa-da, ikkita bo'lim oxirlarida mehmonlar tomonidan kiritilgan gollar bellashuv taqdirini hal qildi. E'tiborlisi, ushbu mag'lubiyat mavsum davomida o'z maydonimizda qabul qilingan yagona mag'lubiyat sifatida qayd etildi. Mavsumdagi eng yomon o'yinimizni ham ana shu oyda o'tkazdik. Tan olish lozim, «Nasaf»ga qarshi o'tkazilgan safar o'yinida (0:3) Ro'ziqul Berdiev shogirdlari futbolchilarimizga hech qanday imkoniyat qoldirishmadi. Shu boisdan ham ikkinchi davradagi ko'rsatkichlarimiz birinchi  davradagiga nisbatan pastroq bo'ldi.  — «Oliy liga-2016» musobaqasining birinchi turida mavsumning dastlabki goliga mualliflik qilgan Zohid Abdullaev to'purarlar bahsida Temurxo'ja Abduholiqovdan keyingi ikkinchi natijani qayd etdi. Bunday futbolchilar doimo barchaning e'tiborida bo'ladi. Nima deb o'ylaysiz, mabodo Zohidga boshqa jamoalardan taklif tushsa, klub rahbariyati va murabbiylar shtabi bunga qanday munosabat bildiradi? Davomi Interfutbol.uz saytida.
— deya xabar beradi uff.uz nashri.