“Bunyodkor” – “Andijon” uchrashuvi qahramonlaridan biri Dostonbek Hamdamov bo'ldi.
Dostonbek Hamdamov zaxiradan maydonga tushishiga qaramasdan “Andijon” jamoasi darvozasiga ikkita to'p kiritishga muvaffaq bo'ldi. Uning ikkinchi goli “Bunyodkor”ning oliy liga doirasidagi 500-yubiley goli sifatida tarixda qoldi.
- Avvalo, bugungi uchrashuvda erishilgan g'alabadan xursandman. O'yindan oldin “Bunyodkor”ning oliy ligadagi urgan gollari 500taga yaqinlashib qolgani haqida o'qigandim. Biroq maydonga tushayotganimda bu statistik ma'lumotni unutdim. O'yin tugab, kiyim almashtirish xonasiga kirganimda 500-golni men urganimni murabbiylarimiz aytishdi. Tarixiy golni urganimdan baxtiyorman. So'nggi uchrashuvlarda asosan zaxiradan maydonga tushayotgan bo'lsam-da, murabbiylarimiz ishonchini oqlashga harakat qilyapman. Men maydonda qancha vaqt to'p tepishimdan qat'i nazar, gol urib, jamoamga muvaffaqiyat keltirishni istayman. Rostini aytsam, yil boshida to'purarlik haqida o'ylagan edim. Lekin ko'p gol urish bo'yicha boshqalar etakchilik qilib ketishdi. Lekin o'zimning shaxsiy statistikamni yaxshilab boryapman. Hozirda klubimizda ko'p gol uryapman. Nasib qilsa, kelasi yili to'purarlikka astoydil harakat qilaman, - deydi Dostonbek Hamdamov.
— deya xabar beradi uff.uz nashri.