O'zbekistonning birinchi raqamli tennischisi Denis Istomin Tailandda o'tkazilayotgan "Bangkok Challenger - 2017" xalqaro turnirini erta tark etishga majbur bo'ldi.
 
Yakkalik bellashuvlarida ikkinchi raqamda saralangan hamyurtimiz dastlabki uchrashuvda mezbonlar vakili Gongsup Gongkarni 6:0, 6:1 hisobida enggan edi.
 
Ikkinchi davrada Denis Istomin chililik Kristian Garin bilan kuch sinashdi. Uchrashuvning birinchi setida hamyurtimiz 6:3 hisobida zafar quchgan bo'lsa-da, ustunlikni ushlab qola bilmadi. Garin qolgan ikki setni 6:4, 7:5 hisobida o'z foydasiga hal qilib, keyingi davraga o'tdi.
 
Denis Istomin 16 yanvar kuni boshlanadigan "Katta dubulg'a" turkumiga kiruvchi Avstraliya ochiq chempionatining asosiy to'r o'yinlariga tayyorgarlik ko'rmoqda.
— deya xabar beradi uff.uz nashri.