Yangi yilning 5 yanvarida Toshkentga jo'nab ketgan G'uzorning “Sho'rtan” jamoasi joriy mavsumga tayyorgarlikning navbatdagi bosqichini poytaxtda o'tkazmoqda.
Oyning 19 sanasigacha o'tkazilishi rejalashtirilgan qishki o'quv-yig'in mashg'ulotlari davomida “Oq bo'rilar” o'z safiga ko'rikdan o'tish uchun bir nechta yangi futbolchilarni jalb etishgan. Azamat Isroilov, Ruslan Vagapov, Saidkamol Akabrov, Aziz G'ulomxo'jaev, Sardor Sobirxujaev, Qadamboy Nurmetov va Obid Jo'raboev shular jumlasidandir.
“Sho'rtan” jamoasini tark etgan futbolchilar ham yo'q emas. Bunga misol qilib, Sunnatilla Mamadaliev va Xasanboy Ergashevni ko'rsatish mumkin.
Ushbu o'quv-yig'in yakunida “Sho'rtan” jamoasi murabbiylar shtabi bitta nazorat uchrashuvi o'tkazishni rejalashtirishgan.
Darvoqe', G'uzorliklarning murabbiylar shtabida ham o'zgarishlar bo'lib o'tmoqda. Mavsum boshida jamoani murabbiy-selektsioner Ruslan Shaymardanov, jismoniy tayyorgarlik bo'yicha murabbiy Zoir Xasanovlar o'z xohishiga binoan tark etgan bo'lsalar, kuni kecha “Sho'rtan” jamoasi rahbariyati o'tgan yilgi mavsum boshida jamoa bosh murabbiy vazifasiga tayinlagan, ammo shartnomani imzolagach, bir necha kundan so'ng “Navbahor”ga o'tib ketgan tajribali mutaxassis Aleksandr Volkov bilan yana kelishuvga erishdi.
Bu safar Volkov “Sho'rtan”da yordamchi murabbiy vazifasida faoliyatini boshladi.

— deya xabar beradi uff.uz nashri.