Bugun Qatar poytaxti Doha shahri boks bo'yicha kattalar o'rtasida o'tkaziladigan XVIII jahon chempionatining tantanali ochilish marosimi bo'lib o'tadi.
Mazkur jahon chempionatida qit'aviy saralash musobaqalaridan muvaffaqiyatli o'tgan jami 260 nafar (Evropadan – 94 nafar, Osiyodan – 66 nafar, Shimoliy va Janubiy Amerikadan – 51 nafar, Afrikadan – 32 nafar, Okeaniyadan – 17 nafar) charm qo'lqop ustalari sovrinli o'rinlar hamda 2016 yili Rio-de-Janeyro shahri (Braziliya)da o'tkaziladigan XXXI yozgi Olimpiada o'yinlarining yo'llanmalari uchun kurash olib boradilar.
Dunyoning etakchi bokschilari ishtirokida o'tadigan mazkur jahon chempionatida Vatanimiz sharafini Hasanboy Do'smatov (-49 kg), Shaxobiddin Zoirov (-52 kg), Murodjon Ahmadaliev (-56 kg), Elnur Abduraimov (-60 kg), Fazliddin G'oipnazarov (-64 kg), Bektemir Meliqo'ziev (-75 kg), Elshod Rasulov (-81 kg), Rustam To'laganov (-91 kg) va Bahodir Jalolov (+91 kg) himoya qiladilar.
Musobaqalar 6 oktyabrdan boshlanib, hal qiluvchi final bahslari 15 oktyabr kuni o'tkaziladi. Shavkat Jalilov
Manzil: O'zbekiston Milliy Olimpiya qo'mitasi matbuot xizmati

— deya xabar beradi uff.uz nashri.