2017 yil boshlanmay turib, o'zbekistonlik futbolchilarning yaqin va uzoq chempionatlarga ko'chib o'tishlari kuchaydi. Bunga sabab sifatida albatta, terma jamoamizning mundial-2018 saralash kampaniyasidagi yaxshi starti va vakillarimizda xalqaro tajriba etarli ekanligini keltirish mumkin. Tabiiyki, futbolchilarimz bilan ishlayotgan agentlar ham bu kelishuvlarda o'ziga xos rol o'ynashadi. Mana, ayni payt Sardor Rashidov («Al-Jaish») va Aziz Haydarov («Al- Shabab») kabi yarim himoyachilarimiz nafaqat o'z klublari, balki Osiyo futbolida ham munosib mavqega egalar. Odil Ahmedovning Xitoy chempionatiga yo'l olgani bahonasida Osiyodagi klublardan qo'nim topayotgan futbolchilarimizga nigoh tashladik. To'g'rirog'i, endilikda muxlislarimiz befarq qaramaydigan «sariq qit'a» jamoalari haqida imkon qadar ma'lumot berishni lozim ko'rdik. Shuningdek, futbolchilarimiz to'p suradigan chiziqlarda raqobat nechog'li baland ekanligiga ham e'tibor qaratdik, albatta. Odil Ahmedov («Shanxay SIPG», Xitoy) 2016 yil 30 dekabrdan «Shanxay SIPG». Xitoy super-ligasining eng  boy klublaridan biri. Tashkil topgan vaqti: 2005 yil 25 dekabr. Laqabi: «qizil burgutlar». Klub egasi: Chen Ksuyuan. Yuridik manzili: Dongping National Forest Park, Chongming 202177, Shanxay. Stadioni: «Shanxay Stedium» (sig'imi - 56842). 2016 yilgi natijasi: Xitoy super-ligasida 3-o'rin. Bosh murabbiyi: Andre Villash-Boash (Portugaliya, 2016 yil 4 noyabrdan). Legionerlari: Xalk, Oskar, (Braziliya), Dario Konka (Argentina), Kim Yu Yon (J.Koreya), Jan Evrard Kuassi (Kot-d`Ivuar), Odil Ahmedov (O'zbekiston). Klubga 2005 yili murabbiy Syuy Gyunbao tomonidan asos solingan. 2005-2011 yillar  «Shanxay Dongya», 2012-2014  yillar oralig'ida esa «Shanxay Telleys» nomi ostida faoliyat yuritdi. 2015 yildan «Shanxay SIPG» nomini oldi. Jamoa 2006 yili Xitoy uchinchi divizioni (bizdagi ikkinchi liga darajasi)da ishtirok etdi. Oradan ikki mavsum o'tib, shanxayliklar birinchi divizionga ko'tarilishdi. 2010 yilgi chempionat boshlanishi arafasida klub oldiga super-liga yo'llanmasini qo'lga kiritish vazifasi qo'yildi. Rahbariyat shu maqsadda Xorvatiya, Makedoniya (Nikola Karchev) va Gaiti (Fabris Noel)dan  futbolchi chaqirdi. Lekin «Shanxay» birinchi divizionda 4-o'rin bilan cheklandi. Umuman, bu jamoaning qisqa muddat ichida Xitoy futboli grandlari qatoriga qo'shilishida asosiy omillardan biri - bu «Genbao» futbol akademiyasi. Qolaversa, baquvvat homiy topish masalasida hech qanday muammo sezilmagan. Ayni paytdagi bosh homiy - «Shanxay xalqaro port guruhi» 2012 yili jamoaning asosiy hamkoriga aylanish yo'lida 40 mln. yuan bahridan o'tgandi. Forbes nash­ri ma'lumotlariga ko'ra, «Shanxay SIPG» Xitoydagi eng badavlat klublar orasida 3-o'rinda. Uning umumiy qiymati 159 mln. dollarni tashkil etadi. «SIPG» 2016 yilning 18 dekabrida e'lon qilingan reytingga ko'ra, Osiyo klublari orasida 27-o'rin (1469 ochko)ni egalladi. Ma'lumot o'rnida aytish kerak, ushbu reyting peshqadami - Jiddaning «Al-Ahli» klubi hisobida 1623 ball bor. Shanxayliklar 2013 yili Xitoy super-ligasida ilk marta ishtirok etish imkoyatiniga ega bo'lishdi. Jamoa shundan buyon milliy chempionatning oliy ligasida quyidagi natijalarga erishdi: 2013 yil - 9-o'rin, 2014 yil - 5-o'rin, 2015 yil - 2-o'rin va 2016 yil - 3-o'rin. «Shanxay SIPG» 2016 yili Osiyo Chempionlar Ligasida ham o'z omadini sinab ko'rdi. Musobaqaga «pley-off» bosqichi orqali qo'shilgan shanxayliklar chorak finalgacha etib kelib, bu raundda bo'lajak g'olib - «Chonbuk Xyunday Motors»ga yutqazishdi. Ya'ni 2ta o'yinda 0:0 va 0:5 hisoblarini qayd etib, o'z ishtiroklarini to'xtatishdi. Jamoa yangi mavsumni ham saralash bosqichidan boshlaydi. Aniqroq aytsak, 7 fevral kuni o'z maydonida «Suxotay» (Tailand) - «Yadanarbon» (Myanma or.) juftligi g'olibi bilan to'qnashadi. Andre Villash-Boash shogirdlari shu birgina uchrashuvda ustun kelishsa, guruh bosqichi yo'llanmasini qo'lga kiritishadi va 21 fevral kuni safarda «Seul» (J.Koreya)ga qarshi o'yin bilan asosiy raundga kirishishadi. Yakunlangan mavsum murabbiylar shtabi super-liga bahslarida yarim himoyada asosan Vu Ley, Yu Xay, Chay Xuikang va Dario Konkaga ishonch bildirdi. Oskar va Odil Ahmedovning safga qo'shilishlari bilan tabiiyki, yarim himoya zimmasiga yuklatiladigan vazifalar ko'lami ham, sifati ham o'zgaradi. Odil ko'proq himoyaga ixtisoslashgani, Oskar esa asosan hujum chizig'i uchun ishlashini inobatga olsak, Osiyo futbolida tez orada  Andre Villash-Boash ishlab chiqqan yangi taktik ishlanma ko'zga tashlansa kerak. Sanjar Tursunov («Al-Xaraytiyat», Qatar) 2016 yil 26 dekabrdan «Al-Xaraytiyat Sports Klub». Qatar Yulduzlar ligasi autsayderdan biri. Tashkil topgan vaqti: 1996 yil. Klub egasi: Hamad bin Tamer al Tani. Stadioni: «Al Xor Stedium» (sig'imi - 12000). 2016 yilgi natijasi: Qatar Yulduzlar ligasida 12-o'rin. Bosh murabbiyi: Amar Osim (Bosniya va Gertsegovina, 2014 yil dekabrdan). Davomi iff.uz saytida.
— deya xabar beradi uff.uz nashri.