"Barselona" bosh murabbiyi Luis Enrike "Vilyarreal"ga qarshi kechgan uchrashuvdagi 1:1 hisobidagi durang haqida fikr bildirdi.
"Barselona" yomon o'ynadi, degim keladi, ammo bu unday emas. "Atletik" va "Vilyarreal"ga qarshi ko'ngildagidek o'ynadik, ammo natija yomon bo'lib chiqdi. Biz uch ochkoga munosib edik, ko'plab vaziyatlar yaratdik. Shu sababli jamoa hozir yaxshi kayfiyatda emas.
Tarkib bo'yicha qarorni men qabul qilaman. Rakitich haqida matbuotda paydo bo'lgan xabar (yarim himoyachi "Manchester Siti"ga o'tishi xabar qilingan - tahririyat izohi) haqiqatga to'g'ri kelmaydi. Xorvatiya. Ispaniya va Angliya matbuotida tarqatilgan xabarlarda haqiqatning choragi ham yo'q. Rakitich o'yin qaydnomasiga kiritilmaganiga sabab boshqa yoqda.
"Vilyarreal"ning o'yiniga qoyil qoldim, u himoyada o'ynash bo'yicha eng yaxshilardan biri. Ammo "Barselona" baribir iqtidor jihatidan yuqori turadi", - deydi Luis Enrike.
Eslatib o'tamiz, "Barselona" ushbu durangdan so'ng uchinchi o'rinda qolib ketdi. Ikkinchi o'rindagi "Sevilya" bilan bir ochko, birinchi o'rindagi "Real" bilan esa 5 ochkolik farq mavjud. Shu bilan birga madridliklar bitta o'yin kam o'tkazishgan.
— deya xabar beradi uff.uz nashri.