APLning yangi yulduzi N`Golo Kante o'z hayoti, bolaligi, «Chelsi» va «Lester»dagi o'yinlari xususida. Ko'pchilik ishonmas balki, lekin bu fakt: angliyaning amaldagi chempioni va ayni payt yangi klubida ham «oltin»ni ko'zlayotgan N`Golo Kante hamon mini-avtomobildan foydalanadi. Tushunarliki, oldinlari kamtarin «Lester»da uncha-muncha futbolchi dabdabali mashina xarid qilishdan tiyilardi. Mana, hozir ham birgina Jeymi Vardi qimmatbaho Bentleyda sayr qiladi, xolos. Qolgan aksariyat futbolchilar Lamborghinini afzal ko'rishmoqda. Vaholanki, klub sohibi bazaga shaxsiy vertolyotida uchib kelishni odatga aylantirgan. Avvalgi mavsum Kante nafaqat maydondagi jonkuyarligi, balki uning tashqarisidagi mittigina temir hamrohi bilan ham ajralib turgandi. - Angliya chempioni hamon mini avtomobildan foydalanmoqda. To'g'ri, tan olish lozim, Mini ham etarli darajada ommalashgan avtomobil rusumi hisoblanadi. Qiziq, siz kamtarlikni xush ko'rasizmi yoki bu mashinaga mehringiz balandligidan uni almashtirmayapsiz? - Ochig'i, o'z avtomobilimning ommalashgan «toychoq»lar sirasiga kirishini bilmasdim. Endi savolga kelsak, o'zimni hech qachon qimmatbaho mashinalarning ashaddiy muxlislari qatoriga qo'shmaganman. Ehtimol, bu kamtarlik belgisidir, balki tabiatan dabdabaga ortiqcha xushim yo'qdir. Umuman, xaridlar masalasida no'noqroqman. Ya'ni har doim ham qimmatbaho buyumlarni sotib olishga ehtiyoj sezmayman. Bunaqasi ichki ruhiyatimga to'g'ri kelmaydi. - Mayliku-ya, ammo topish-tutishingizga yarasha, qulaylik his etishni istamaysizmi? - Agar avtomobilni nazarda tutsak,Mini menga juda qulay va eng ma'qulidir. Unda avvalo, Britaniya qoidalari asosida mashina haydashni o'rganish oson. Bu avtomobilni «Lester»da o'ynayotgan vaqtim xarid qilganman va hamon birgamiz. Zero, uning umumiy holati juda yaxshi. Shunday ekan, nega endi yaxshigina avtomobildan voz kechib, boshqasiga pul sarflashim kerak? Deylik, Minida shahar bo'ylab sayrga chiqsam, birov menga ortiqcha e'tibor ham qaratmaydi. - Bir qarashda, ishonish ham mushkul: bundan atigi 17 oy oldin kamtarin «Kan»ning oddiy futbolchisi edingiz, endi esa o'z mamlakatingizning chinakam yulduzi sanalasiz. Deylik, yaqinda maxsus so'rovda sizni o'yinga eng kuchli ta'sir qiluvchi futbolchi sifatida e'tirof etishdi. Voqealarning bunday keskin rivojlanishini kutganmidingiz? - To'g'risi, yo'q. Ammo o'z salohiyatimga hech qachon shubha qilgan emasman. Boshqacha aytganda, futbolga aynan hayotda o'z o'rnimni topish vositasi sifatida qaraganman. - Umumiy statistikangiz chindan ham, hayratlanarli. Mana, Angliyaga ko'chib o'tganingizdan buyon 2ta jamoa safida to'p surdingiz. Ular bu vaqtda Kante ishtirokisiz 56ta o'yinda 68 ochko to'plashdi, siz maydonga tushgan 54ta bahsda esa naq 123 ochko ishlashdi. Muhimi, «Lester» siz bilan chempion bo'ldi, «Chelsi» esa ishonch bilan shunga intilmoqda... - Bunday maqtovni eshitish yoqimli, albatta. Ammo «Lester»ning oltin medal yutganiyu, «Chelsi»ning joriy mavsum yana chempionlikka da'vogar bo'lib turganini birgina men bilan bog'lamaslik kerak. Futbol jamoaviy sport turi ekan, natijalarni bir futbolchi hisobiga yozish mutlaqo noto'g'ri. «Lester»ning o'tgan mavsumdagi shov-shovlarida ham, londonliklarning hozirgi yurishlarida ham katta guruh mehnati bor. - Unda aytingchi, qisqa vaqtda mutlaqo boshqa N`Gologa aylanganingiz siri bormi va o'ziga xos inqilobdan so'ng hayotingiz nechog'li o'zgardi? - Birinchidan, hech qanday sir yo'q - barchasi zamirida sidqidildan to'kilgan ter yotibdi. Ikkinchidan, men bosh-qa N`Golo bo'lib qolmadim - hamon o'sha-o'shaman. Shunday ekan, hayotim ham avvalgidek... Xususan, kun tartibimda o'zgarish sezmayapman: mashg'ulotlar, o'yin va shundan so'ng uyga qaytish (kuladi). Doimo xuddi shunday yashaganman. O'zi hayotim mashg'ulotlar, o'yinlar va uyda hordiq chiqarishdangina iborat ekanligidan ba'zan xijolat ham tortaman. Ammo hozir boshqasiga shunchaki, vaqt yo'q, ehtiyoj ham. Ha, tan olishim kerak, menga nisbatan e'tibor nisbatan oshdi. Deylik, endilikda matbuotda suratim ko'p bosilyapti. Shuni hisobga olmaganda, o'zgarish yo'q... - Umuman, kuchli e'tibor va atrofingizdagi voqealar o'zingizga yoqyaptimi? - Nima desam ekan, hali aytishga arzirli darajada mashhur futbolchi emasman. To'g'ri, odamlar meni taniy boshlashdi. Lekin ko'proq endilikda «Chelsi»da o'ynayotganim tufayli bo'lsa kerak. Ha, o'tgan mavsum «Lester» bilan APL shohsupasiga ko'tarilganim ham ma'lum darajada mashhurlik keltirgani ayni haqiqat. Ammo shaxsan men uchun chetdagilarning e'tibori uncha katta ahamiyat kasb etmaydi. - Taqqoslash uchun aytsak, Frantsiya va Angliyadagi holatingiz o'rtasida qanday farq bor? Davomi interfutbol.uz saytida.
— deya xabar beradi uff.uz nashri.