Bundan biroz vaqt oldin “Bunyodkor” akademiyasiga qarashli maydonda “Navbahor” va “Olmaliq” jamoalari o'rtasidagi nazorat uchrashuvi yakunlandi. Uchrashuvning dastlabki 45 daqiqaligida hisob ochilmadi. Ikkinchi bo'lim o'rtalarida Alisher Mahmudov Azizbek Turg'unboevning o'ng qanotdan oshirib bergan to'pini darvozaga yo'llab hisobni ochdi. Uchrashuv yakuniga qadar ushbu hisob saqlanib qoldi Shu tariqa futbolchilarimiz 2017 yildagi dastlabki nazorat o'yinida 1:0 hisobidagi g'alabani qo'lga kiritishdi. 
Jamoamiz uchrashuvni quyidagi tarkibda o'tkazdi: Akmal Tursunboev, G'iyos Komilov, Hasanboy Ergashev, Abbos Otaxonov, Tohir Shamsitdinov, A'zam Aliev, Dilshod Jabborov, Zohir Pirimov, Islom Isoqjonov, Farruh Shotursunov, Ravshan Xursanov.
Zaxiradan maydonga tushganlar: Alisher Mahmudov, Alisher Samatov, Alisher Mirzaev, Ilhom Boydedaev, Azizbek Turg'unboev, Abdulaziz Sultanov.
“Olmaliq” bilan o'tgan uchrashuvda jamoa safiga bugun kelib qo'shilganliklari uchun Jahongir Mehmonov va Ro'zimboy Ahmedovlar maydonga tushishmadi. Shuningdek, Mirzohid G'ofurov tarkibga kiritilmagan qolgan futbolchilarimiz bilan birgalikda ham o'yinni kuzatish bilan cheklandi. Ertadan jamoamiz a'zolari yana ikki mahaldan shug'ullanishni davom ettirishadi. Navbatdagi nazorat o'yini esa 13 yanvar kuni Muborakning “Mash'al” klubiga qarshi o'tkaziladi.
— deya xabar beradi uff.uz nashri.