Bilasiz, albatta, milliy jamoamiz 2 yildan buyon oxirgi oy - dekabrda o'yin o'tkazayotgani yo'q. Lekin bu yilni yakunlab beruvchi 12-oy biz uchun ahamiyatsiz ekanligini anglatmaydi. Odatga ko'ra, qish fasli O'zbekiston futboli uchun ozgina tanaffus va yangi mavsumga tayyorgarlik davri hisoblanadi. Umuman, bu faslda agar yirik turnirlar yoki ularning saralash bahslari o'tkazilmasa, terma jamoalarning uchrashuvlari asosan o'rtoqlik maqomida kechadi. E'tiborli tomoni, oxirgi paytlarda aynan qish fasli Osiyoda rasmiy turnirlar tashkillashtiriladigan muhim pallaga aylanib qoldi. Deylik, oxirgi 2ta qit'a chempionati biz uchun qahraton kunlarga to'g'ri keldi. Shunday ekan, qish hisobidagi 3 oyning futbolimizda tutgan ahamiyati yanada oshdi. Qolaversa, 2019 yilgi Osiyo kubogi ham aynan qish fasliga belgilangan. Shuningdek, Qatarga ishonib topshirilgan JCh-2022 bahslari noyabr-dekabr oylarida bo'lib o'tadi. Shu holatning o'zi yilning istalgan choragida o'ynashga tayyor turishimiz zarurligini anglatadi. Milliy jamoamizning dekabr oyida qanday to'p surgani masalasi ana shu vajdan muhim mavzulardan biridir. 12-oy ham yakunlanib borayotgan ekan, bugun shu xususda batafsil gaplashamiz. Dekabr tarixi 1998 yil 15 dekabr. Shu kuni Tailandning Changmay shahrida XIII Osiyo kubogi doirasida 2-tur bahslari bo'lib o'tdi. O'sha uchrashuv biz uchun tarixiy ahamiyatga ega. Zero, braziliyalik mutaxassis Ubiraja Vega da Silva boshqaruvidagi milliy terma jamoamiz o'z tarixidagi eng yirik hisobli g'alabani ramiylashtirgandi - 15:0. Tarixga ozgina sayr uyushtirib, 90 daqiqa davomida naq 15ta gol urgan tarkibni birrov eslatib o'tamiz: Oleg Belyakov, Andrey Ryazantsev (Mirjalol Qosimov, 46), Andrey Fyodorov, Sergey Lushan, Aleksandr Sayun (Shuhrat Rahmonqulov, 32), Nikolay Shirshov, Rashid G'o-furov, Andrey Akopyants, Sergey Lebedev, Ne'matullo Qutiboev, Igor Shkvirin (Aleksey Semyonov, 46). Shuningdek, Osiyo kubogi final bosqichidagi debyutimiz ham aynan dekabr oyiga to'g'ri kelganini alohida ta'kidlash o'rinli. Esingizda bo'lsa, terma jamoamiz Osiyo chempionati-96ni xitoyliklarga qarshi o'yin bilan boshlagan va Igor Shkvirin hamda Oleg Shatskix tomonidan urilgan gollar evaziga 2:0 hisobida g'alaba qozongandi. Tushunarliki, dekabr oyiga to'g'ri kelgan jami 16ta o'yinning loaqal bittasi yurtimizda o'tkazilmagan. To'g'ri-da, noqulay ob-havo sharoitida mehmonlarni kutib olish osonmi? Yana qor yog'ib bersami, maydonni tozalash yoki oppoq chim ustida o'ynash uchun sariq yoki qizil rangli to'p topish muammosi ko'ndalang bo'lishi hech gap emas. Xullas, oxirgi yillarda dekabr oyida BAAning Dubay va Sharja shaharlarida tegishlicha 3 va 2 marta maydonga tushganimizning o'zi ko'p narsadan dalolat beradi. Issiq o'lkalarda shunchaki, o'rtoqlik uchrashuvlari orqali rasmiy musobaqalarga tayyorgarlik ko'rganmiz. Misol uchun, Samvel Babayan boshqaruvidagi hozirgi jamoamiz ham mart oyida Suriya termasiga qarshi kechadigan o'yinga BAAda Armaniston va gruziyaliklar bilan o'tkaziladigan «o'rtoq»liklar orqali hozirlik ko'radi. Umumiy olganda, terma jamoamizning jami 251ta o'yinidan 16tasi dekabr oyi hissasiga to'g'ri keladi. Bu barcha o'yinlarimizning 6,37 foiziga tengdir. Boshqacha aytganda, terma jamoamiz dekabr oyida asosan istisno tariqasida maydonga tushadi. Aniqrog'i, Osiyo kubogi qish fasliga belgilansagina 12-oyda o'rtoqlik o'yinlariga murojaat etadi. Davomi interfutbol.uz saytida.
— deya xabar beradi uff.uz nashri.