“Qo'qon-1912” jamoasi tarkibiga Jizzaxning “So'g'diyona” klubidan kelib qo'shilgan Akmal Xolmurodov bilan jamoadagi dastlabki taassurotlari haqida suhbatlashdik. – Akmaljon jamoamizga xush kelibsiz. Qo'qonga kelishingiz qanday amalga oshdi? – Meni Qo'qonga jamoa bosh murabbiyi No''mon Hasanov taklif qildilar. Biz No''mon aka bilan bir-birimizni yaxshi bilamiz. “Paxtakor” jamoasida birga ishlaganmiz. Bosh murabbiy bu yil jamoa oldiga kuchli oltilikka kirish vazifasi qo'yilganini, kelgusida rejalar yanada yuqori ekanligini aytganlaridan so'ng men taklifni qabul qildim. Albatta har bir futbolchi o'z oldiga yuqori maqsadlarni qo'ygan jamoada to'p tepishni istaydi. – Jamoaning mashg'ulotlarida qatnashmoqdasiz, “Paxtakor”ga qarshi o'yinda maydonga ham tushdingiz. Klub haqida dastlabki taassurotlaringiz qanday? – Qo'qon jamoasida meni juda yaxshi kutib olishdi. Ko'plab futbolchilar bilan oldindan do'stligimiz uchun jamoaga kirishib ketishim qiyin kechmadi. Klubdagi tashkiliy ishlar esa meni lol qoldirdi. Hammasi a'lo darajada. Mashg'ulotlar juda qiziqarli va jiddiy tarzda o'tkazilmoqda. Jamoada hamma ahil-inoq, ichki muhit havas qilarli darajada. Men o'ylayman bu yilgi mavsumda Qo'qonlik muxlislar o'zlari kutayotgan jamoani maydonda ko'rishadi. “Paxtakor” bilan nazorat o'yinida garchi mag'lubiyatga uchragan bo'lsak ham o'yinimiz yomon chiqmadi. Hatto biz dastlab hisobda oldinga chiqib olgan edik. Birinchi bo'limni o'zidayoq maydonda bir kishi kam bo'lib qolganimiz yakunda natijaga o'z tasirini o'tkazdi deb o'ylayman.
— deya xabar beradi uff.uz nashri.