O'tgan haftada Oliy Liganing eng yaxshi futbolchilarini sanagan edik. Bu safar o'z odatimizga binoan, «O'zbekistonning 2016 yildagi eng yaxshi futbolchisi» nomiga munosib futbolchilarni saraladik.
ELDOR ShOMURODOV
Klubi: «Bunyodkor»
Mavsumdagi o'yinlar soni: 50
Gollari: 14
21 yoshli Eldor 2016 yilda naqd 50 ta uchrashuvda maydonga tushdi. Yil davomida milliy terma jamoada asosiy tarkibda o'ynadi. «Bunyodkor»ning etakchisiga aylandi. Jamoa Chempionlar Ligasiga o'tish o'yinlari orqali yo'l oldi. Hal qiluvchi bahsda aynan Eldorning ikki goli jamoaga «Al Shabab» ustidan g'alaba keltirdi. Yarim-himoyachi transfer bilan shug'ullanuvchi Rossiya kompaniyasi bilan shartnoma imzoladi. Ruslar uning Evropada o'ynay olishiga ishonmoqda. Shomurodov terma jamoadagi o'yinlari bilan muxlislarning tanqidlariga sabab bo'lganiga qaramay, u murabbiylarning ko'rsatmalarini aniq bajardi. Yuqoridagi omillar Eldorni O'zbekistonning joriy mavsumdagi eng yaxshi futbolchilari qatoriga qo'shishimizga imkon beradi.
MARAT BIKMAEV
Klubi: «Lokomotiv»
Mavsumdagi o'yinlar soni: 46
Gollari: 15
Marat «Lokomotiv» bilan O'zbekiston chempioni bo'ldi, mamlakat kubogini qo'lga kiritdi. Klubining g'alabalariga munosib hissa qo'shdi, lekin Marat bu yil terma jamoada yaxshiroq o'ynadi. Sergeev maydonda hech narsani uddalolmay turgan bir vaqtda Marat jamoamizning asosiy hujumchisiga aylandi. Uning Xitoyga urgan golini eslang. Bunday mahorat bilan uzoq burchakni nishonga olish hazilakam ish emas, haddan tashqari yopiq o'yin ko'rsatayotgan raqibga qarshi. Yoki Koreyadagi goli. Qaysi hujumchimiz o'sha vaziyatda bundayin sovuqqonlik bilan harakat qila olardi? Marat ko'p klublarda o'ynadi, «Alaniya» safida Evropa Ligasida ham qatnashdi, lekin aynan 2016 yil u uchun faoliyatidagi eng yaxshisi bo'ldi. Chunki har qanday futbolchi asosiy terma safida  bo'lsagina yaxshi o'ynayapman, deyishi mumkin.
SARDOR RAShIDOV
Klubi: «Al Jaish»
Mavsumdagi o'yinlar soni: 57
Gollari: 23
Sardor terma jamoada oxirgi vaqtlarda yaxshi o'yin ko'rsata olmayotgan bo'lsa-da, mavsum futbolchimiz uchun yomon o'tgani yo'q. Qatarda chempionat noyabrda boshlanishini hisobga olsak, o'tgan yil boshlangan mavsumda Sardor 57 o'yinda maydonga tushdi. Bu o'yinlarda 23 marta gol urdi. Terma jamoa safida 5 marta. Natijalardan ko'rinib turibdiki, Sardor sermahsul o'yin ko'rsatdi. Lekin muxlislar undan ko'proq narsa kutishgandi. Ayniqsa, terma jamoa safida. U eng muhim o'yinlarda yo'qolib qoldi. Kerak vaqtda gollar ura olmadi. Natijada asosiy tarkibdan tushib qoldi. Lekin klubdagi o'yinlari, Chempionlar Ligasining yarim finaligacha etib borganini inobatga olmay bo'lmaydi. O'tgan yilda bo'lgani kabi Sardor bu yil ham eng yaxshilardan bo'ldi.
TEMURXO'JA ABDUXOLIQOV
Klubi: «Lokomotiv»
Mavsumdagi o'yinlar soni: 46
Gollar: 31
Yilning eng yaxshi futbolchisini aniqlashda asosan futbolchining terma jamoadagi o'yinlariga e'tibor qaratiladi. Lekin murabbiyning shaxsiy adovati sabab termada o'ynamayotgan futbolchi mamlakatning bosh jamoasida o'ynamasligi uchun aybdor emas. Bu o'z manfaatlaridan jamoa manfaatlarini ustun qo'ya olmaydigan murabbiyning xatosi. Temurxo'ja «Lokomotiv»ning O'zbekiston chempioni bo'lishi uchun katta ish qildi. U jamoa to'purari bo'ldi. Eng muhim gollarni urdi. Kubok finalida ham yagona golga aynan u mualliflik qildi. Chempionlar Ligasida ham yaxshi o'ynadi va jamoasi bilan chorak finalgacha etib bordi. O'zbekistonning eng kuchli jamoasi safida eng yaxshi bo'ldi. Shu sabab u yilning eng yaxshi futbolchilari qatoridan o'rin olishga munosib.
ALEKSANDR GEYNRIX
Klubi: «Ordabasi»
Mavsumdagi o'yinlari soni: 35
Gollari: 14
Qosimov vaqtida terma jamoadan tushib qolgan Sasha, Babayan jamoaga kelgach, yana bosh jamoaga qaytdi va o'yini ochilib ketdi. Terma jamoamizning ruhiy etakchisi va ustuniga aylandi. Bu ruhiy ko'tarinkilik Geynrixning klubdagi o'yinlariga ham ta'sir qilmay qolmadi. U «Ordabasi» etakchisiga aylandi va Qozog'iston chempionati to'purarlaridan bo'ldi. Terma jamoadagi o'yinlari esa tahsinga sazovor. Suriya bilan Toshkentdagi, Qatar bilan mehmondagi o'yinlarni eslang. Qozog'istonda 4 jamoa Evrokuboklar saralashida qatnashadi. Birinchi uchta o'rin sohiblari va kubok egasi. «Ordabasi» chempionatda 4-o'rinni egalladi, lekin omadli Geynrixning jamoasi baxtiga kubok ham mamlakat chempioniga nasib qildi va 4-yo'llanma aynan ularga nasib etdi. Bunda Sashaning o'rni katta bo'ldi.
VITALIY DENISOV
Klubi: «Lokomotiv» (Moskva)
Mavsumdagi o'yinlari soni: 65
Gollari: 0
Terma jamoa safida eng barqaror o'yin ko'rsatadigan futbolchi aynan Denisov. Rus jurnalistlarining naz-dida, Denisov Rossiya Premer-Ligasidagi eng yaxshi chap qanot himoyachisi. U Rossiyada ham yaxshigina obro'ga ega bo'lib ulgurdi. Terma jamoa safida doim asosiy tarkibda o'ynadi va nafaqat qanotda, markaziy himoyada sheriklariga yordam berdi. O'tgan yil Odil Ahmedov O'zbekistonning eng yaxshi futbolchisi bo'lgandi, undan oldingi yil esa bu unvon aynan Denisovga nasib qilgan. Bu mavsumda ham Denisov himoyachi bo'lishiga qaramay, eng yaxshi futbolchilardan bo'ldi.
ODIL AHMEDOV
Klubi: «Krasnodar»
Mavsumdagi o'yinlari soni: 65
Gollari: 6
Terma jamoa etakchisi va sardori Odil Ahmedov mavsumni juda yaxshi o'tkazdi. To'g'risi, Mirjalol Qosimovdan keyin hech bir futbolchi terma jamoa uchun bunchalik muhim figuraga aylana olmagan edi. Hattoki ikki marta Osiyoda tengsiz bo'lgan Server Jeparov ham. Odil «Krasnodar»da ham jamoa etakchilaridan bo'ldi. Muxlislar uni eng yaxshi 3 futbolchi qatoriga kiritishdi. Toshkentdagi Eronga qarshi o'yinda bildik, Odil biz uchun qanchalik muhim futbolchi ekanini. Odil o'ynamagan o'sha o'yinda jamoaning umuman o'yini ochilmadi. Markaz bo'm-bo'sh bo'lib qoldi. Boshqa o'yinlarda ham Odil haqiqiy sardorlarga xos harakat qildi va bizningcha, 2016 yilning eng yaxshi futbolchisi nomiga aynan Ahmedov munosib.
O'tkir JALOLXONOV, «Erudit Sport» gazetasi.
— deya xabar beradi uff.uz nashri.