O'tgan 2016 yilgi mavsumda oltin dublni qayd etgan Qarshining “Sevinch” jamoasi 16 yanvardan yangi mavsum tayyorgarliklarini boshlaydi. Shu kuni futbolchilarimiz Qarshi shahridagi klubimiz qarorgohida yig'ilishadi va yangi mavsum tayyorgarlik mashg'ulotlariga kirishadi. Har yilgidek jamoamiz bu yil ham 22 yanvardan Toshkent shahrida boshlanadigan mini futbol (futzal) bo'yicha XIII O'zbekiston chempionatida ishtirok etadi. Shu munosabat bilan dastlabki tayyorgarlik mashg'ulotlari ana shu chempionatga qaratiladi. “Sevinch” jamoamiz futbolning ushbu turi bo'yicha ham mamlakatimiz ayollar jamoalari o'rtasida etakchi hisoblanadi. Jamoamiz mini futbol bo'yicha 12 karra O'zbekiston chempioni va 10 marta O'zbekiston kubogi sohibi bo'lishgan. Ayni kunlarda jamoamizning 9 nafar futbolchisi va 2 nafar murabbiylari Olmaliq shahrida o'tkazilayotgan ayollar O'zbekiston milliy terma jamoasi yig'inida ishtirok etishmoqda. Ushbu yig'in 19 yanvar kuni nihoyasiga etadi va futbolchilarimiz jamoamiz safiga kelib qo'shilishadi.
— deya xabar beradi uff.uz nashri.