Seshanba kuni O'zbekiston Birinchiligining ikkinchi bosqich, 14-tur uchrashuvlari bo'lib o'tdi. Sokin o'tgan turda deyarli sensatsion natija qayd etilmadi. Oqibatda barcha masalaga so'nggi ikki turda oydinlik kiritilishi ma'lum bo'ldi. Demak, noyabr oyining birinchi haftasida oliy liganing 2015 yilgi mavsumida debyutant bo'ladigan ishtirokchi nomini bilib olamiz.
“Obod” “Tsementchi”dan alamini ortig'i bilan oldi!
Turning markaziy uchrashuvi Toshkentda bo'lib o'tdi. Oliy ligaga chiqish uchun asosiy da'vogar bo'lib turgan “Obod” o'z uyida Quvasoyning “Tsementchi” jamoasini qabul qilib, gollarga boy uchrashuvda yirik hisobda g'alaba qozondi. Yodingizda bo'lsa, mazkur raqiblarning birinchi davrada Farg'onada bo'lib o'tgan o'yinda mezbonlar g'alaba qozonib, poytaxtliklarning o'ziga xos yurishiga nuqta qo'ygandi. Javob bahsida Bobur Zuhriddinov shogirdlari kim aslida kim ekanligini amalda isbotladi. Garchi bellashuv avvalida mehmonlar hisobni ochgan bo'lsa-da, “Obod” futbolchilari qolgan daqiqalarida raqib darvozasiga istagancha gol urdi. “Tsementchi” a'zolari ham qo'ldan kelgancha gol urdi, biroq urilgan gollar hech bo'lmasa durangga zamin yaratmadi.
Qaysidir ma'noda shu kuni “Tsementchi” emas, balki “Oq-tepa” mag'lubiyatga uchradi. Boisi, peshqadam bo'lib turgan Ildar Sakaev jamoasi seshanba kuni G'ijduvonda kichik hisobda g'alaba qozongan bo'lsa-da, aynan shu turda asosiy raqibining ochko yo'qotishini kutgani aniq. Chunki ikki jamoa orasidagi ochkolar farqi bittani tashkil qilmoqda. “Oq-tepa”dan farqli ravishda “Obod” kelasi turlarda nisbatan engilroq raqiblarga qarshi maydonga tushadi. Tabiiyki, bu bellashuvlarda ikkinchi o'rindan joy olib turgan jamoani ochko yo'qotishini taxmin qilish mushkul. Aksincha, noyabr oyining ikkinchi sanasida “Mash'al-2”ni qabul qiladigan “Oq-tepa” ushbu bahsda g'alaba qozongan taqdirda ham so'nggi turda jiddiy raqibga qarshi maydonga chiqadi.
Ikkinchi bosqich start olganida oliy ligaga chiqishga asosiy da'vogarlardan biri bo'lgan “Xorazm” kurashdan chiqib ketgan bo'lsa-da, mavsumning oxirgi uchrashuvini, qolaversa, o'z uyidagi bahsni mag'lubiyat bilan yakunlashga rozi bo'lmasa kerak. 13-turda “Orol”ni mag'lubiyatga uchrata olmagan “Oq-tepa” o'zini qiyin holatga solib qo'ydi. Agar Nukus jamoasini Toshkentdan ochkosiz qaytarganida Ildar Sakaev shogirdlari kelayotgan dushanba kuni oliy liga chiptasini qo'lga kiritgan bo'lardi. Aynan shu xato klubga qimmatga tushishi mumkin. Shuning uchun ham “Tsementchi”dan qahramonlik kutilgani aniq, biroq Abdumalik Hakimov shogirdlari qahramonlik ko'rsata olmadi.
Mabodo “Tsementchi” kuni kecha “Obod” bilan hech bo'lmaganda durang o'ynaganida ham “Oq-tepa” kelasi turdayoq oliy liga yo'llanmasini qo'lga kiritishi mumkin bo'lardi. Mag'lubiyat - hammasi so'nggi turlarga qolganidan darak beradi. To'g'ri, “Oq-tepa”ning ham, “Obod”ning ham taqdiri o'z qo'lida. Qaysi jamoa xato qilsa, o'sha klub oliy liganing to'g'ridan-to'g'ri yo'llanmasidan quruq qoladi. Ammo yuqorida ta'kidlaganimizdek, taqvimga ko'ra, peshqadamning holati biroz og'irroq. Bu haqida yuqorida aytib o'tdik.
Nazariy jihatdan hozircha “O'zDongJu”da ham imkoniyat bor. Shunchaki, seshanba kuni “Lokomotiv-BFK”ni safarda mag'lubiyatga uchratgan “bo'yoqchilar” ikki peshqadamning xatosini kutishga majbur. Tabiiyki, bunday bo'lmasligi haqiqatga juda yaqin. Avvalgi maqolalarimizda aytib o'tganimizdek, “bo'yoqchilar” “Obod”ga mag'lub bo'lganida kurashdan chiqib bo'lgan edi. 15-turdan so'ng “O'zDongJu” oliy liga chiptasi uchun bo'layotgan kurashdan rasman chiqadi. Ikkinchi bosqichning ikkinchi davrasida ketma-ket beshta o'yinda g'alaba qozongan “Zomin”ni omad tark etgan ko'rinadi. O'tgan turda “O'zDongJu”ga yutqazgan zominliklar seshanba kuni “Yozyovon-Lochinlari”ni qabul qilib, durang o'ynadi. “Xorazm” esa, “Xotira-79”ni qabul qilib, yirik hisobda g'alaba qozondi. Biroq bu g'alaba Vali Sultonov jamoasining muxlislarinigina xursand qildi, xolos.
15-tur oldidan
15-turda markaziy o'yinlarga guvoh bo'lmaymiz, lekin qiziqarli o'tishini taxmin qilishimiz mumkin bo'lgan bahs yo'q emas. Xususan, “Zomin” Quvaysoyda “Tsementchi” mehmoni bo'ladi. Garchi o'yin natijasi kuchli uchlikka jiddiy ta'sir o'tkazmasada, jamoalar mavsumni yuqori o'rinlarda yakunlash uchun ham maydonga faqat g'alaba maqsadida tushadi.
Peshqadamlarning biri “Obod” dushanba kuni Namanganda “Xotira-79” mehmoni bo'lsa, “Oq-tepa” o'z uyida “Mash'al-2” bilan hisob-kitob qiladi. Yodingizda bo'lsa, Muborakdagi uchrashuvda yosh “gazchilar” tajribali raqibini kichik hisobda mag'lubiyatga uchratgan edi. Taqdirni qarangki, mezbonlarda shu uchrashuvda ham “Mash'al-2”dan mag'lubiyat alamini olish, ham oliy liga chiptasi taqdirini hal qilish imkoniyati bor edi. Ammo o'zlarini qiyin vaziyatga solib qo'ygan Ildar Sakaev shogirdlari endi so'nggi ikki turni katta bosim ostida o'tkazadi. Aksincha, “Obod” futbolchilari raqibining xatosini kutadi.
So'nggi tur oldidan uchinchi o'rin taqdiriga oydinlik kiritilishi mumkin. Ayni vaqtda eng yaqin ta'qibchisi “Zomin”dan besh ochko oldinda borayotgan “O'zDongJu” 15-turda “Nasaf-2”ni qabul qiladi. Katta ehtimol bilan bu bellashuvda mezbonlar g'alaba qozonadi. Agar taxminimiz o'zini oqlasa, “bo'yoqchilar” mavsum yakunlanishidan bir tur avval uchinchi o'rinni naqd qiladi.
O'ZBEKISTON BIRINChILIGI
IKKINChI BOSQICh
15-tur. 2 noyabr (dushanba)
PAXTAKOR-2 – OROL
O'ZDONGJU - NASAF-2
YoZYoVON-LOChINLARI - NASAF-2
TsEMENTChI – ZOMIN
XOTIRA-79 – OBOD
KOSONSOY – XORAZM
OQ-TEPA - MASh'AL-2
3 noyabr (seshanba)
NBU-OSIYo – G'IJDUVON.
Manba: arena.uz
— deya xabar beradi uff.uz nashri.