QAYSI YuRTLARDA JAHON ChEMPIONI BILAN FAXRLANIShLARI MUMKIN? Futbol olamining gultoji sanalgan milliy jamoalar o'rtasidagi mundiallarda sanoqli yurt vakillari chempionlik maqomiga erishganlar. Aniqroq aytsak, hozirgacha atigi 8ta terma jamoa jahon kubogi sovrindoriga aylangan, xolos. Lekin JCh g'oliblarining etnik tarkibi ancha boy. Inchunin, er yuzidagi yana bir qator mamlakatlar qaysidir jahon chempioni bilan faxrlanish-g'ururlanishga haqli. Soccer.ru sayti xodimlari ana shu hijatga alohida yondashib, JCh oltin medali sovrindorlari tarkibi  «geografiya»sini kengaytirgan futbolchilarga nazar solishdi. Ya'ni ular futbol tarixida oltin toj yutmagan yurtning chempion  vakillarigagina e'tibor qaratishdi. Bosh-qacha aytganda, 30-yillarda Italiya termasining taxtga ko'tarilishiga beminnat hissa qo'shgan Braziliya, Urugvay va argentinaliklarni hisobga olishmadi. Shuningdek, yaqin o'tmishda «Skuadra adzurra»ning muvaffaqiyatida ozmi-ko'p rol o'ynagan yana bir omadli «oriundo»  (ajdodlari Apennin yarim orolidagi mamlakatga bevosita bog'liq futbolchi) - Mauro Kamoranezi ham ro'yxatga kiritilmadi. Yana jamoasi jahon chempionatida g'olib chiqqan yurtda muqim yashaydigan millat vakillari chetda qoldirilgan. Misol uchun, basklar. Zero, ular turli mamlakatlarning milliy jamoalari tarkibida ajoyib natijalarga erishganlarki, bu haqda alohida gaplashish kerak. Qarang, mag'rur bask millatiga mansub futbolchilar naq 5ta milliy jamoa bilan jahon chempioni bo'lishgan! Aniqrog'i, Urugvay, Braziliya, Argentina, Frantsiya va Ispaniya sharafini munosib himoya qilishgan. Qolaversa, allaqachon nemis mazurlari nomini olgan slavyanlar avlodlari ham e'tiborga olinmagan. Chunki ularning tarixiy yurtlari bilan bog'liqliklari shartli, xolos. Shunga qaramay, «begona» mamlakat jamoasi safida JCh oltin medali yutganlardan yaxshigina guruh shakllandi. Xorvatiya: Mario VARLEN 1934 yilgi jahon chempioni (Ita-liya terma jamoasi tarkibida) Umuman olganda, Xorvatiya va jahon chempionlari o'rtasidagi aloqalar ancha mustahkam. Har holda, jahon kubogini boshi uzra baland ko'targan futbolchilardan ikki nafari aynan shu mamlakat hududida tug'ilgan. Birinchisi - Mario Varlen. U Avstro-Vengriya hududida joylashgan Fiume (hozirgi Rieka) shahridan. Qolaversa, Mario 22 yoshigacha aynan Riekada yashagan, futbolga shu erda qadam tashlagan. Keyin esa «Yuventus» afsonasiga aylanish barobarida «moviy gvardiya» uchun o'ynab, jahon chempioni maqomini ham olgan. Aytgancha, Xorvatiyada tuzilgan «keksa sinora» fan-klubiga aka-uka Varlen (Jovanni ham taniqli futbolchi edi)lar nomi berilgan. Mariodan tashqari, 1950 yili Urugvay milliy jamoasi safida jahon tojini kiygan Ernesto Vidal ham Xorvatiyada tug'ilgan - Bue shahrida. Biroq u asosan italyanlarga borib taqaladigan ajdodlari bilan faxrlanadi, ya'ni o'zini xorvat sanamaydi. Qolaversa, tanishtirishga muhtoj bo'lmagan Diego Maradonaning «ildizi» ham xorvatlarga begona emas. Ruminiya: Yozef POZIPAL' 1954 yilgi jahon chempioni (GFR terma jamoasi tarkibida) Mundial-34dan 20 yil keyinga «siljiymiz» va Ruminiyaga tabrik yo'llaymiz. 1954 yil yuz bergan «Bern mo''jizasi» ishtirokchilaridan biri Yozef Pozipal shu mamlakatning Lugoj shahrida tavallud topgan. To'g'ri, Yozef ota tomondan baribir, etnik nemis hisoblanadi, ammo u naq 16 yil  Ruminiyada yashagan. Demakki, Pozipalning xotiralarida Sharqiy Evropadagi bu mamlakatga ham joy bor, albatta. Shuningdek, 1974 yili GFR terma jamoasida asli belgiyalik Xerbert Vimmer ham mundial oltin medalini qo'lga kiritgan. Biroq Vimmerlar oilasi G'arbiy Germaniyaga ko'chib o'tgan vaqt bo'lajak jahon chempioni chaqaloq bo'lgan. Boz ustiga, Xerbert millati bo'yicha ham sof nemisdir. Shuning uchun Belgiyani jahon chempioniga ega mamlakatlar qatoriga qo'shish uncha to'g'ri emas. Chili: Oskar ORTIS 1978 yilgi jahon chempioni (Argentina terma jamoasi tarkibida) Argentina milliy jamoasining birinchi marta jahon chempionatida g'olib chiqishiga hissa qo'shgan yarim himoyachi Chilining Chakabuko provintsiyasida dunyoga kelgan. Bilasiz, KONMEBOL a'zolaridan Argentina, Braziliya va Urugvay termalari jahon kubogiga sazovor bo'lishgan. Demakki, Oskar Ortis hisobiga Janubiy Amerikadagi chempionlar «geografiya»si nisbatan kengayadi. Ukraina: Petro VERXOVOD 1982 yilgi jahon chempioni (Italiya terma jamoasi tarkibida) Jahon chempionati-82 g'oliblaridan ikki nafari boshqa mamlakatlarga iftixor tuyg'usini ulashgan. To'g'ri, Klaudio Jentile faqat shartli ravishda. Zero, u sitsiliyaliklar oilasi farzandi, ammo shunchaki, Liviyada tug'ilgan. Petro Verxovod esa ota tomondan sof ukrain. Ya'ni uning otasi - Ivan Lukyanovich ikkinchi jahon urushi vaqti asirga tushgan va keyinchalik Italiyada muqim yashab qolishga qaror qilgan. Xullas, Petro aynan Apenninda tug'ilgan. Ukrainchada aytsak, Pyotr Ivanovich Verxovod futbolchilik faoliyati davomida «Yuventus», «Milan» va «Roma» kabi klublarda to'p surgan, «Sampdoriya»da esa chinakam afsonaga aylangan. Ya'ni Genuya jamoasida naq 12 yil muvaffaqiyatli o'ynagan. Davomi Interfutbol.uz saytida.
— deya xabar beradi uff.uz nashri.