Ertaga jamoamiz a'zolari ikki kunlik dam olishdan keyin yana mashg'ulotlarni boshlab yuborishadi. Xabaringiz borki, mavsumlar oralig'ida tarkibga bir qator futbolchilar jalb etilib ular bilan shartnomalar imzolanmoqda. Bugun serbilik futbolchi Nemanya Yovanovich bilan shartnoma imzolandi. O'tgan mavsumni “Andijon” va “Qizilqum” klublari safida o'tkazgan hujumchi bilan bir yillik kelishuvga erishildi. O'zbekistondagi faoliyatini 2015 yili “Olmaliq” klubida boshlagan futbolchi oliy ligada 57 ta o'yinda maydonga tushib, 22 ta gol urishga erishgan. Yovanovich faoliyati davomida Yugoslaviya, Ruminiya, Norvegiya va Qozog'iston klublari safida ham to'p surgan.
Shu o'rinda aytish joizki, Yovanovichni o'z tarkibida ko'rishni istagan klublar soni bir nechtani tashkil etgandi. Hujumchi bir necha kun oldin Toshkentga etib kelgan bo'lib, o'tgan vaqt davomida muzokaralar olib borildi. Futbolchni boshqa klubga o'tib ketishi mumkinligini inobatga olgan murabbiylarimiz Yovanovich haqida hech qanday ma'lumot bermaslikni aytib o'tishgandi. Aynan shu sababli hujumchini jamoamiz safiga qo'shilishi mumkinligi haqidagi xabarni saytimiz orqali e'lon qilmay turgandik. Shu sababli, muxlislarimizni to'g'ri tushunishlarini so'rab qolamiz. “Navbahor”ning to'laqonli a'zosiga aylangan Yovanovich ertadan jamoamiz mashg'ulotlarida qatnashishni boshlaydi.
Ma'lumot uchun
Nemanya Yovanovich
1984 yilning 14 avgustida Serbiyaning Negotin shahrida tug'ilgan.
Bo'yi 191 sm.
Ampluasi hujumchi.
To'p surgan jamoalari
2000-2003      “Tsrvena Zvezda”
2001-2002      “Jeleznik”
2002-2003      “Big Bull"     14 (0)
2003-2007      “Unirya Urzicheni”   47 (7)
2004              “Arjesh”        4 (1)
2006              “Panduriy”   4 (0)
2007             ”Rimniku-Vilcha”    16 (4)
2007-2008      “Universitatya”        29 (6)
2008-2010      ”Vasluy”        30 (5)
2010    ”Unirya Alba-Yuliya”            15 (1)
2011    ”Taraz”           29 (7)
2012    “Qayrat”        14 (2)
2012    “Tobol”          9 (2)
2013    “Sannes Ulf”         9 (0)
2014    “Spartak Semey”      30 (7)
2015    “Olmaliq”     28 (9)
2016    “Andijon”    13 (5)
2016    “Qizilqum”   14 (8)
— deya xabar beradi uff.uz nashri.