Yangi mavsumga tayyorgarlikni BAAda davom ettirayotgan Toshketning «Lokomotiv» klubi qisqa fursat ichida to'rt nafar yangi futbolchi bilan shartnoma imzoladi. Ulardan biri, shu kungacha «Olmaliq» jamoasi sharafini himoya qilib kelgan yarim himoyachi Diyor Turopovni siz yaxshi taniysiz. 1994 yilning 9 iyulida tug'ilgan Diyor Jizzax futboli tarbiyalanuvchisi hisoblanadi. U 2013 yildan beri «Olmaliq» libosida maydonga tushib kelayotgan edi. Turopov o'z vaqtida o'smirlar, yoshlar hamda olimpiya terma jamoalarimizda ham o'ynagan. O'ng va chap qanot yarim himoyasida, shuningdek, hujumchi ortida ham birdek samarali harakat qila oladigan futbolchi «temiryo'lchilar» safida o'z o'rnini topa olishiga ishonmoqda. Bu haqda futbolchi BAAga safar oldidan ma'lum qildi. - Diyor, avvalo, har doim o'z oldiga yuksak maqsad qo'yadigan klub safiga o'tganingiz bilan tabriklaymiz! Bu voqea qanday ro'y berdi? - Tabrik uchun rahmat. Bilasizmi, kutilmaganda «Lokomotiv» murabbiylari menga taklif bilan chiqishdi. Bu esa tabiiyki, juda qiziqarli ko'rindi. Sababi, «Lokomotiv» O'zbekiston chempioni sifatida OChL­da ishtirok etadi va  shu omil shart­nomani ikkilanmay imzolashimga turtki berdi. - Siz «Olmaliq» klubi sharafini bir necha yil himoya qildingiz. Jamoa bilan xayrlashish oson bo'lmagandir? - Albatta. «Olmaliq»da o'tgan damlar bir umr qalbimda qoladi. Zero bu erda, Igor Shkvirin qo'li ostida o'sishga erishdim, turli yoshdagi terma jamoalarda o'ynadim. Qolaversa, yoshlar o'rtasidagi jahon chempionatida qatnashish baxti nasib qildi. Bu muvaffaqiyatlarning bari bevosita «Olmaliq» klubi bilan bog'liq. - Ehtimol, jamoani o'zgartirishingizga  Shkvirinning «Olmaliq»dan ketishi sabab bo'lgandir? - Yo'q, bunday emas. «Lokomotiv» safiga o'tishimni Igor Anatolevich iste'fosi bilan bog'lamagan bo'lardim. Shunchaki, o'zimni kuchli klubda sinab ko'rishni lozim topdim. - Shkvirinning jamoadan ketishini qanday qabul qildingiz? - Bilasizmi, futbolda hech narsa abadiy emas. Igor Shkvirin bir necha yillar mobaynida «Olmaliq»ni boshqarib keldi. Bu vaqt ichida ko'plab iste'dodli futbolchilar kashf etildi. Umuman olganda, natijalar ham chakki bo'lmadi. «Olmaliq» kuchli klublarni mag'lub eta olishi bilan tanilgan. Bu yutuqlarda murabbiyning hissasi katta. - «Temiryo'lchilar» bilan qancha muddatga shartnoma imzoladingiz? - Kelishuvimiz bir yilga mo'ljallangan, hozircha. - «Lokomotiv» murabbiylari bilan gaplashdingizmi? Ular sizga qanday talab qo'yishdi? - Ha, gaplashib oldik. Ular jamoaga foydam tegishiga umid qilishayotganini aytishdi. Buyog'iga esa hammasi o'z qo'limda. Ya'ni, menga imkoniyat berildi, bundan qay darajada foydalanish birgina o'zimga bog'liq. - Adashmasam, sizni «Lokomotiv»ga avval ham taklif qilishgandi. O'shanda Toshkent jamoasiga o'tishingizga nima to'sqinlik qilgan? - To'g'ri, o'z vaqtida taklif bo'lgan. Lekin o'sha paytda men «Lokomotiv»da o'ynashga tayyor emas edim. Ko'proq o'yin amaliyotiga ega bo'lish maqsadida «Olmaliq»da qolishga qaror qilgandim. - «Olmaliq»ning o'tgan yilgi natijalariga qanday baho berasiz? - To'g'risini aytish lozim, ayrim o'yinlarda bizga omad etishmadi. Ba'zi uchrashuvlarda o'z imkoniyatimiz darajasida o'ynay olmadik. Boz ustiga, birinchi davradan so'ng tarkibimizda jiddiy o'zgarish bo'ldi va davralar oralig'ida bir guruh asosiy tarkib futbolchilariga javob berildi. Ikkinchi davrada esa deyarli yangilangan tarkib bilan ishtirok etdik. Shu bois, o'zimiz istagan maqsadlarga erisha olmadik. - Yangi jamoangizda nechanchi raqamni tanladingiz? Davomi Interfutbol.uz saytida.
— deya xabar beradi uff.uz nashri.