Bugun kunning ikkinchi yarmida Toshkentdagi “O'zbekiston” mehmonxonasida to'plangan jamoamiz mavsumga tayyorgarlikning navbatdagi bosqichini boshlaydi. Ayni paytda Qibrayda boshlangan mashg'ulotda bir necha kun oldin “Navbahor” a'zosiga aylangan serbiyalik hujumchi Nemanya Yovanovich ham ishtirok etmoqda. Shuningdek, o'tgan mavsum ikkinchi yarmini “Olmaliq”da o'tkazib, jamoamizning dekabr oyidagi yig'inida qatnashgan darvozabon Akmal Ortiqov ham safga qo'shildi. Shu kunlarda jamoa ixtiyoriga yangi o'yinchilarni etib kelishi kutilmoqda. Shu o'rinda jamoamizda yangi shifokor ish boshlaganligini ham qo'shimcha qilish joiz. Oldingi yillarda Bekobodning “Metallurg” klubida ish yuritgan Baxtiyor Mirsagatov endilikda “Navbahor”da faoliyat olib boradi.
Navbatdagi bosqich davomida uchta nazorat uchrashuvini o'tkazish rejalashtirilgan. Ertaga “Qo'qon-1912” jamoasi futbolchilarimizga raqiblik qiladi. Mazkur uchrashuv 18 yanvar kuni soat 15.00da “Oq-tepa” klubiga qarashli o'yingoh maydonida bo'lib o'tadi. Navbatdagi uchrashuvlar esa “Metallurg” (21 yanvar) va “Buxoro” (26 yanvar) jamoalariga qarshi bo'lib o'tadi.
— deya xabar beradi uff.uz nashri.