O'tgan shanba kuni Londonning «Chelsi» klubi «Vest Xem» maydoniga safar qilib, mag'lubiyatga uchradi. Bu esa jamoaning chempionatdagi beshinchi omadsizligi. Mavsum davomida esa ettinchisi: Joze Mourino shogirdlari superkubok finalida «Arsenal»dan, EChLda esa «Portu»dan engilishgandi. «Bu - faoliyatimdagi eng yomon davr. Lekin o'z o'rnida, fantastik tajriba ham», - dedi yaqinda «ko'klar» ustozi. Xullas, «Chelsi» hamon barchani ajablantirishda davom etmoqda. Klub «boss»lari (eng avvalo, Roman Abramovich)ning toqati esa borgan sari toq bo'lib bormoqda. Shu oy, aniqrog'i, joriy hafta oxirida Mourinoga chiqish eshiklari ko'rsatilsa ham, ajabmas. Angliya matbuoti esa bu borada aniq sanani aniqlashga ham ulgurdi - 31 oktyabr. Xuddi shu kuni «aristokratlar» o'z maydonlarida Yurgen Klopp­ning «Liverpul»i bilan kuch sinashishadi. «OneMourchance» («Yana bir imkon») - ayni paytda Londonning yirik nashrlari o'yin haqida shunday sarlavhali maqolalar chop etishmoqda. Xo'sh, u ketishi kerakmi yoki qolishi?
Ketishi kerak
Hammasi 8 avgustdan boshlandi: ayni shu sanada Angliyaning amaldagi chempioni «Stemford Bridj»da «Suonsi» qarshiligini enga olmadi. Jahl otiga mingan Mourino esa bunda klub shifokori Karneyroni aybladi. Vaholanki, Eva shunchaki, o'z vazifasini bajargandi, xolos. Bu mojaro odamlar xotirasidan ko'tarilmay turib, bosh murabbiy yangi va albatta, shov-shuvli bayonot bilan chiqdi: ya'ni, uning fikricha, hakamlar «Chelsi» foydasiga qaror qabul qilishdan qo'rqar ekan! Mazkur noodatiy chiqishning oxiri shu bo'ldiki, Mourino bo'lmag'ur gaplari uchun 50 ming funt jarima to'lashdan tash­qari, shartli diskvalifikatsiyaga ham uchradi. Tabiiyki, u apellyatsiya huquqidan ham mahrum qilingandi. Uchinchi mojaro esa o'tgan haftada ro'y berdi. «Bundan buyon mendan quvnoq gaplarni kutmang! Endi hech kimni ayamayman», - dedi Mourino jurnalistlarga «Vest Xem»ga qarshi o'yindan oldin. Buning boisi esa juda kulgili: ma'lum bo'lishicha, Jozening muxbirlarga qarshi «urush e'lon qilishi»ga ko'chada uni uch-to'rt nafar bebosh o'smirlarning tasvirga tushirish uchun harakat qilishgani sabab bo'lgan ekan. «Bolg'achilar»­ga qarshi o'yin tanaffusidagi janjal esa Mourino hissiyotlarini umuman boshqara olmay qolganidan darak bermoqda.
Eng yomoni shundaki, «Benazir» hissiyotlarga berilib, hatto, o'z shogirdlari bilan ham san-manga borib qolmoqda. Masalan, uning g'azabiga shu paytgacha Eden Azar, Branislav Ivanovich, Nemanya Matich va hatto Jon Terri ham uchradi. Bungacha esa Mourino har qanday holatda ham o'z shogirdlarini xuddi ona burgutdek himoya qilardi. Aslini olganda esa, Mourino - futbolning haqiqiy muxlisi. Oxirgi sakkiz yilda u faqat olti oygina futbolsiz yashadi, xolos. Bu muddat u «Chelsi»dan «Inter»ga o'tayotgan davrga to'g'ri kelgandi. Yurgen Klopp, Xosep Gvardiola, Karlo Anchelotti va Rafael Benites kabi murabbiylar ham yangi ish boshlash arafasida ma'lum muddat hordiq chiqarishdi. Aftidan, Jozega ham qisqa muddatli ta'til zarar qilmaydi, chog'i.
Ketmasligi kerak
Mourino «Chelsi»ga qaytar ekan, bu safar klubni uch yildan so'ng tark etish niyati yo'qligini ma'lum qilgandi. Uning bosh maqsadi - «Manchester Yunayted» uchun Aleks Fergyuson qanday qadrli bo'lsa, xuddi shu darajaga etish edi. Buni u «Meni «Chelsi»dan haydab yubormagunlaricha ishlayveraman», - deya tasdiqlab ham qo'ygandi. Qolaversa, «Chelsi» aynan Mourino tufayli «pul to'la qopcha» qabilidagi masxaraomuz laqabdan forig' bo'ldi. Misol uchun, londonliklar yozda o'ta qimmat narx talab qilingani uchun «Everton» himoyachisi Stounzdan voz kechishdi. Shuningdek, Joze frantsiyalik yarim himoyachi Pol Pogba borasida ham o'z pozitsiyasini barchaga namunali tarzda ko'rsatib qo'ydi: «Men Eyfel minorasini uyimga o'rnatolmayman». Gap shundaki, portugaliyalik mutaxassis ortiqcha mablag' sarflamagan holda o'zi istagan jamoa tuzmoqchi. Lekin to'g'risini aytish kerak, hozircha uning istaganlari osonlikcha amalga oshmayapti. Undan bir yil oldin yosh Kurtuani deb, Chexni «qurbon» qilgandi. Hozir esa Zumaning tajribasini oshirish uchun Terrini nafaqaga tayyorlayapti. Endi hamma gap klub rahbarlarida qoldi. Agar ular Mourinoning jamoani yoshartirish siyosatiga ishonch bildirishsa, keyingi mavsumda hammasi o'zgarishi mumkin.
Tanganing orqa tomonida yana bir jiddiy muammo bor: agar Joze hozir ishdan olinsa, uning o'rniga darhol munosib nomzod topish qiyin. Klub bosh murabbiyligiga asosiy nomzod deb tan olinayotgan Diego Simeone mavsum o'rtasida «Atletiko»ni tashlab ketmasligi aniq. Xuddi shu e'tirofni Xosep Gvardiolaga ham ishlatish mumkin. Karlo Anchelotti (yanvargacha dam olishini e'lon qilgan) va Gus Xiddink (premer-liga uchun haddan tashqari keksa) nomzodlari sal tuman ortida ko'rinmoqda.
Davomi InterFUTBOL gazetasi blogida.
— deya xabar beradi uff.uz nashri.