"Real" bosh murabbiyi Zinedin Zidan Ispaniya Kubogi doirasida "Selta"ga qarshi kechgan dastlabki bahsdagi 1:2 hisobidagi mag'lubiyat haqida fikr bildirdi.
"Selta" namoyish etgan o'yindan hayron emasman. Ular bizga zarar etkazishi mumkinligini bilardik. Hozir eng yaxshi davrimizni o'tkazmayapmiz, ammo men tashvishda emasman.
Biz ortga chekina olmaymiz, oldinda Ispaniya chempionati bahslari bor. Men vaziyatni o'nglash yo'lini topishim lozim.
O'yin biz uchun og'ir boshlandi, biz avvaldan rejalashtirilgan o'yinni ko'rsata olmadik. Men barchasini tahlil qilib, qayta ko'rib chiqishim lozim.
Taktika ustida ishlayapman, ayniqsa hujumda to'g'ri sxema topish harakatidaman. O'yin omadsiz kechdi, ammo bunga sabab jamoaning jismoniy holati emas. "Sevilya"ga qarshi kechgan o'yin og'irroq bo'lgandi.
Biz "Real"miz va ishlashda davom etishimiz shart. Biz vaziyatni o'nglaymiz. Bunga qadar shu ishni uddalab kelganmiz, ammo oxirgi ikkita o'yinda hammasi boshqacha ketdi", - deydi Zidan.
— deya xabar beradi uff.uz nashri.