Kecha bolaligida futbolchi emas, boshqa kasbni tanlashi mumkin bo'lgan futbol yulduzlari haqida ma'lumot berib o'tgan edik. Bugun ana shu maqolaning ikkinchi qismini e'tiboringizga havola etamiz. Uelslik sobiq «qizil iblis» Rayan Giggz agarda voqealar rivoji boshqacharoq kechganida, u futbolchi emas, balki regbichi bo'lardi. Uning otasi Denni Uilson mashhur regbichilardan hisoblanardi va o'g'li uning ta'siri ostida ulg'aygandi. «Otam men uchun eng asosiy qaxramon edi. Rostini aytadigan bo'lsam, hech qachon futbolchilarning o'yinidan zavqlanmaganman. Albatta Brayan Robson va Mark Xyuzlarning o'yinlarini yoqtirardim, ammo faqatgina otam o'yinlarining haqiqiy fanati edim. Uch-to'rt yil davomida yakshanba kunlari qayerda bo'lishimdan qat'i nazar, uning o'yinlarini tomosha qilardim. U shunday iqtidorga ega ediki! Ba'zan u bilan birga mashg'ulotlarga borardim va har doim unga o'xshashni orzu qilardim, - deydi futbolchi. 15 yoshida ota-onasi ajrashganidan so'ng, u futbolga ko'ngil qo'yadi va oqibatda futbol afsonasi darajasiga ko'tariladi. Giggz shuningdek regbichi bo'lib ketishi ham mumkin edi: «Kimga shu haqda gapirmay, hamma menga xayron bo'lib qaraydi. Ammo yoshlik chog'larimda men tengdoshlarimga qaraganda tikroq, tezroq va kuchliroq edim. Buning ustiga har doim regbichilar qurshovida bo'lganman». «Manchester Yunayted» muxlislari balki Giggzning otasiga rahmat aytishar. To'g'ri oilaning ajrashib ketishidan xursand bo'lish yaramaydi. Biroq, mana shu narsa aynan Giggzni buyuk futbolchi bo'lib etishishiga xizmat qilgan bo'lsa neajab. Finlandiyada xokkey rivojlangan va fin yurtida ushbu sport turi bilan shug'ullanuvchi bolakaylar safi juda keng. Ular orasida Sami Xyuppya ham bo'lgan. «Liverpul»dagi o'yinlari orqali butun dunyoga tanilgan Sami bolaligida ko'prok xokkey bilan shug'ullanardi. Lekin ota-onasi talabi bilan xokkey shaybasini futbol to'piga almashtirishga majbur bo'ldi. Keyinchalik bu ahdi xususida shunday degandi: «O'ylaymanki, boshida o'z kuchimni futboldagina sinab ko'rishga imkoniyatim bor edi». Davomi Furqat Yusupov blogida.
— deya xabar beradi uff.uz nashri.