Yangi yil - mo''jizaviy bayram, unda etti uxlab tushingizga kirmaydigan voqealar yuz berishi mumkin. Shu sabab betakror bayram shukuhi kezib yurgan pallada anchayin kamtarin jamoalarda chinakam futbol mo''jizasini ko'rsatgan Jey Jey Okocha haqida hikoya qilishni lozim topdik. Bu iqtidor sohibining tengsiz bo'lishi ota-onasiga avvaldan ma'lum bo'lganmi yoki u shunday bo'lishini orzu qilishganmi, har holda farzandlariga Jey Jey deb nom berishdi. Qo'shaloq ism­ning bejizga berilmaganini Okocha o'zining maftunkor o'yinlari bilan isbotladi. Shu bois, tengi yo'q bu iqtidor sohibini «kumirlar kumiri» deb atadik. Chunki millionlab muxlislar qalbidan joy olgan Ronaldino ham Okochani ustoz sifatida hurmat qilishini ta'kidlab o'tgandi. Har qanday futbolchining tabiati, saviya darajasini uchrashuvlardagi harakatlari belgilab beradi. Jey Jey Okochani futbol olamiga tanitgan ilk voqea 2004 yil yanvarda yuz bergandi. Angliya kubogi turnirining yarim finali dastlabki bellashuvida «Aston Villa»ga qarshi maydonga tushgan «Bolton» jarima zarbasini tepish huquqiga ega bo'lgandi. «Villa» jonli devorga ikki nafar o'yinchisini qo'yish bilan kifoyalandi, Okocha esa zarbani amalga oshirish tadorigini ko'rdi. Bunday vaziyatlar mo''jiza uchun eng qulay fursat. Darvoza tomon zarba berilishini hech kim kutmaydi - masofa juda uzoq. Ammo Jey Jey o'z niyatida qat'iy. Chunki uning fizika yoki matematika qonunlariga bo'ysunmaydigan o'zgacha olami bor, u erda hammasi Jey Jeyning izmiga bo'ysunadi. Hujumchining o'ng oyog'i bilan bergan zarbasidan so'ng to'p g'ayritabiiy yo'nalishda shiddat bilan darvoza tomon yo'l oldi. Maftunkor parvoz fantastik gol bilan intiho topdi. Ana shu mo''jizaviy lavhalar muxlislar, hatto futbolchilar uchun ham chinakam fantastika bo'lsa, nigeriyalik iqtidor sohibi uchun odatiy hol! Ana shu tug'ma iqtidor tufayli Okocha Enugu ko'cha futbolidan Evropa sahnasiga chiqishga muvaffaq bo'ldi. Futbolchi Noynkirxenning «Borussiya»si, «Ayntraxt», «Fenerbaxche», «Bolton», «Xall Siti» va «PSJ» klublarida to'p surdi. Frantsiyadagi yorqin o'yinlari tufayli bo'lajak yulduz - Ronaldinoni asir etdi. Xalqaro arenalarda esa Okocha «superburgutlar» sharafini JCh-94da munosib himoya qildi. Afrika Millatlar kubogi musobaqalarida Nigeriyaning asosiy yulduzi sifatida qit'a chempionatining oltin, kumush va 3ta bronza medallarini qo'lga kiritishiga beqiyos ulush qo'shdi. Bundan tashqari, terma jamoa 1996 yili Olimpiada chempionligini qo'lga kiritdi. Mo''jizakor tomoshalar 1998 yilgi Frantsiya mundialida ham davom etgach, «qora qit'a» vakili evropalik mutaxassislar nazariga tushdi. E'tiborli jihati shundaki, aynan uning mahorati evaziga ko'pchilik uchun unut bo'lib ulgurgan kamtarin «Bolton» qaytadan jonlandi, Okocha chinakam yulduzga aylandi! Taajjubki, shunday afsungar bir marta bo'lsada Afrikaning eng yaxshi futbolchisi unvoniga loyiq topilmadi. O'z yurtida topmagan e'tiborni tumanli o'lkada topdi: 2002 yili «Bolton» tarkibidan joy olgan hujumchini tribunalar to'xtovsiz qo'shiqlar jo'rligida kuzatishardi: «Qo'shaloq ism Okochadan boshqa hech kimda yo'q. Maydonda ham undan zo'ri yo'q!». Albatta, muxlislar e'tirofi har doim ham jiddiy qabul qilinavermaydi, uni shunchaki hazilga yo'yish ham mumkin. Lekin oxir-oqibat ularning haqliklari ma'lum bo'ldi: Jey Jey o'ta noyob yuqori mahorati evaziga hayratomuz fintlarini amalga oshirardi. Bunday harakatlarini ko'pchilik murabbiylar ortiqcha deb tushunib, o'z shogirdlarini bu yo'ldan qaytarishga urinishardi. Chunki ularga avvalo natija muhim. Biroq Okocha oldiga qo'ygan vazifalarni a'lo darajada bajarardi. Aniqrog'i, maydonda o'z bilganicha harakat qilsada, murabbiyni ranjitib qo'ymasdi. Hujumchining to'p bilan amalga oshirayotgan tryuklari qanchadan-qancha yosh futbolchilarga ilhom bag'ishladi. Ko'pchilik futbol yulduzlari uning o'yinlari soni, urgan gollari tufayli, ya'ni statistik ma'lumotlariga ko'ra tilga olishadi. Qo'shaloq ismli qahramonimiz e'tirofi uchun buning o'zi kamlik qiladi - Okocha harakatlarining o'ziyoq tarixiy ahamiyatga ega. Vaholanki, uning hisobida hayratomo'z mo''jiza gollar etarli. Qolaversa, Jey Jey «qora ishlar»dan ham hech qachon bo'yin tovlamagan. Davomi Interfutbol.uz saytida.
— deya xabar beradi uff.uz nashri.