O'zbekistonlik FIFA va OFK instruktori Farhod Abdullaev Malayziya poytaxti Kuala-Lumpur shahrida bo'lib o'tgan nazoratchi hakamlar seminarida OFK maslahatchisi sifatida ishtirok etdi. 17–19 yanvar kunlari bo'lib o'tgan seminarda Osiyo qit'asidan jami 76 nafar nazoratchi hakam qatnashdi. Tadbirni o'tkazishdan asosiy maqsad – nazoratchi hakamlarni yangi ma'lumotlar bilan tanishtirish, ularning bilimini sinovdan o'tkazish hamda 2017 yilgi mavsum uchun kerakli materiallar bilan ta'minlashdan iborat. Seminarning birinchi kunida nazoratchi hakamlarga hisobot yozish borasida tushintirishlar olib borildi hamda ularning mas'uliyati nimadan iborat ekani aytildi. Shuningdek, seminar davomida ingliz tilidan test hamda uchrashuvdan so'ng ro'y berishi mumkin bo'lgan vaziyatlar stsenariysi bo'lib o'tdi. Bundan tashqari, nazoratchi hakamlarni zamonaviy futbol trendlari bilan yanada yaxshiroq tanishtirish maqsaida jamoa taktikalari borasida darslar o'tkazildi. FIFA va OFK instruktori hisoblangan Farhod Abdullaev o'z bilim va ko'nikmalari bilan o'rtoqlashdi. Ma'lumot o'rnida, Farhod Abdullaev o'tgan yilning 1 noyabridan boshlab OFK hakamlar departamentining texnik eksperti sifatida ish boshlagan.
— deya xabar beradi uff.uz nashri.