Bugun Birinchi Liganing 15-turidan o'rin olgan ettita uchrashuv bo'lib o'tdi. Ko'pchilikni diqqat markazida peshqadamlarning qanday natija ko'rsatishi qiziqtirayotgandi. Shu boisdan o'yinlarni diqqat bilan kuzatib bordik.
Xabaringiz bor, 14-turdan keyin turnir jadvalida "Oq-tepa" jamoasi peshqadamlik qilayotgandi. Bu jamoa hisobida 60 ochko bor edi. Undan keyingi o'rinda esa "Obod" kelayotgandi. Bu jamoa esa hamshaharlaridan atiga bir ochko kam jamg'arishgandi. 15-turda bu jamoalar turli xil raqiblarga qarshi o'ynashlariga to'g'ri keldi. "Oq-tepa" uyda "Mash'al-2" bilan o'ynagan bo'lsa, "Obod" safarda "Xotira" mehmoni bo'ldi.
Shuni aytish kerak, "Oq-tepa"ni uyda yosh "gazchilar" bilan durang o'ynaganligi ko'pchilikni ajablantirganligi tabiiy. Chunki o'z oldiga katta maqsadlarni qo'ygan jamoaning bunday tarzda ochko yo'qotishi ko'pchilikni hayratini oshirdi. Boz ustiga klub o'z maydonida to'p surdi. Bu holat joriy yilda klub bilan birinchi marotaba ro'y berayotganligi yo'q. Avvalroq ham "Oq-tepa" "Orol"ni uyda enga olmagandi. Bu safar "Mash'al-2"dan ustun bo'la olmadi.
"Obod" esa safarda o'ynaganiga qaramay, ishonchli g'alabasi bilan peshqadamlikni o'ziga qaytarib oldi. Endi chempionat tugashiga bir tur qolganidan jadvalda ko'p narsa hal bo'lib qolgandek guyo.
7 noyabr kuni "Obod" uyda "Kosonsoy"ni qabul qiladi. So'zssiz ushbu juftlikda favorit mezbonlardir. Agar jamoa g'alaba qozonadigan bo'lsa, oliy liga yo'llanmasini naqd qiladi. Hisob qanday bo'lishidan qat'iy nazar, "Obod"ni faqat g'alaba yo'llanma olib beradi. "Oq-tepa" esa yutgan taqdirida ham elitaga chiqish vazifasini uddasidan chiqa olmaydi. Bunga shak-shubha yo'q. Ular o'z omadlarini "pley-off"da sinashiga to'g'ri keladi.
Demak, "Obod" yo'llanmani o'z qo'lida turibdi. Ko'ramiz, buni Xayrulla Abdiev va Bobur Zuhriddinov shogirdlari qay darajada uddasidan chiqadi.

— deya xabar beradi uff.uz nashri.