Rossiyaning TsSKA klubi sobiq futbolchisi Keysuke Xonda mana ikki mavsumdirki, Apenninda to'p suryapti. O'tgan davr mobaynida yaponiyalik xavbek 51 marta (44 bor asosiy tarkibda) maydonga tushdi, 9ta gol urdi, 7 marta samarali to'p uzatishni amalga oshirdi, 8 bor sariq kartochka bilan «siylandi». Etiborlisi, yaqinda «samuray» OAV orqali «Milan» rahbarlarini shunaqangi adabini berdiki, oqibatda bugun ko'pchilik yapon futbolchisining klubdagi faoliyati shu tariqa nihoyasiga etishini bashorat qila boshladi.
Odatda kamgap bo'lgan yarim himoyachi klubning so'nggi paytlardagi omadsizligiga futbolchilar emas, menejment aybdorligini aytdi. «Milan»­dagi muammolar hanuz o'sha-o'sha. Biz hech narsa o'rganmayapmiz, oldingi xatolardan xulosa yasamayapmiz, - dedi sobiq «armiyachi» yapon jurnalistlari bilan suhbatda. - Bu esa klubni qayta qurishdan ancha olisdaligimizni bildiradi. So'nggi mavsumlardan ma'lum bo'lyaptiki, «Milan»ga xuddi «PSJ» va «Manchester Siti»dagi kabi katta mablag' sarflanmas ekan, undan muvaffaqiyat kutish befoyda. Shunday qilingan taqdirda ham, klubning butun  tuzilmasini qayta ko'rib chiqish kerak. Barchasiga faqat futbolchilarni ayblashdan foyda yo'q. So'nggi yillarda «San-Siro»da ko'plab yaxshi ijrochilar o'ynashdi. Hozir ham klubni kuchaytirishga 100 mln. evro sarflandi. Shunga qaramay nega milliy termalarning o'yinchilari «Milan»­ga kelgach, o'zlarini ko'rsatisholmayapti?».
 Suhbat so'ngida yapon futbolchisi yuqoridagi so'zlari uchun tanqidlar ostida qolishdan qo'rqmasligini aytdi. Javob esa o'zini ko'p kuttirmadi. «Keysuke, agar «Milan» «PSJ» kabi sarf-xarajatlar qilganida eng avvalo, seni eshikkacha kuzatib qo'ygan bo'lardi», - deb yozdi o'z tvitterida italiyalik taniqli sharhlovchi Tankredi Palmeri.
Umuman olganda, «Milan» rahbariyatining harakatlari bir qancha savollarni tug'diradi. Hozirgacha Bi Techaubol bilan klub aktsiyalarining yirik paketini sotish bo'yicha shartnoma imzolanmagan. O'tgan mavsumda ayanchli ahvoldaligini namoyish qilgan mudofaa mustahkamlanmadi. Romanoli va Elini sotib olishdan zarar ko'rildi. Bosh murabbiy vazifasiga Sinisha Mixaylovichning taklif qilinishi ham alal-oqibat xato bo'lib chiqdi. Serb jamoa nazoratini qo'ldan chiqardi. U «Milan»ni goh olovga tashlasa, goh sovuqqa ravona qilmoqda. Yaxshi o'tkazilgan o'yindan so'ng navbat albatta, yomoniga kelyapti. Mixaylovich hozirgacha biror-bir bahs taqdirini saqlab qoladigan hal qiluvchi qaror qabul qilganicha yo'q.
Darvoqe, bularning barchasi o'yinchilar mas'uliyatini engillashtirmaydi. Eng qizig'i, yuqoridagi gaplarni butun jamoani ortidan ergashtirayotganlar emas, balki mazmunsiz o'yin ko'rsatayotgan futbolchi aytdi. Dastlab, Italiyadagi yarim yilni muvaaffaqiyatsiz o'tkazgan yarim himoyachiga «A» seriyasiga moslashish uchun vaqt kerak, deyildi. Yangi mavsumni nisbatan yaxshi boshlagan Xonda bir oy o'tmay «so'ndi». Kichik jarohatlar davomiyligi ortidan kelgan jismoniy tayyorgarlikning ortga ketishi, Osiyo kubogidagi ishtirok, o'z pozitsiyasiga xos bo'lmagan joyda to'p surish kabi bahonalar uning ixlosmandlarini bir oz bo'lsada tinchlantirgandir ham: «Kelgusi mavsumda «samuray» nimaga qodirligini hammaga ko'rsatadi», - deyishdi ular. Xondaning o'zi ham shu fikrda edi.
Mixaylovich va Berluskoni tomonidan tanlangan 4-3-1-2 sxemasi ham Keysukega ideal tarzda mos kelardi. Zero, u TsSKAda ham hujumchi ortida o'ynagan, termadagi joyi ham  aynan shu erda edi. Uning hujumlarni loyihalashtirishi italyan klubi selektsionerlarini o'ziga jalb qilgani ham bor gap. Avgustdagi nazorat o'yinini o'z pozitsiyasida o'tkazgan yapon futbolchisi o'shanda quvonchdan yashnagandi: «O'nlik»dagi o'rnimga qaytganimdan xursandman. Bu pozitsiyada jamoaga ko'p foyda keltirishimga shubha yo'q».
Ammo ayni kunlarda Xondaning statistikasi buning aksini ko'rsatmoqda: 4ta bahsda darvoza tomon 5ta zarba yo'lladi. Gol urish uyoqda tursin, hatto samarali to'p uzatgani ham yo'q. Yarim himoyachining maydonda borligi sezilmayapti. Ikki forvardning tezkor qarshi hujumlarida ularni barcha qo'llab-quvvatlamoqda, ammo  Xonda emas. Pozitsion hujumlarda esa u yarim himoya va hujum chizig'ini bog'lovchi futbolchi qilishi shart bo'lgan ishning o'ndan birini ham bajarmayapti. To'p uzatishlardagi aniqlik ijobiyday, ammo uning ijrosidagi uzoq masofaga to'p oshirishlar yo'q hisobi.
Davomi InterFUTBOL gazetasi blogida.
— deya xabar beradi uff.uz nashri.