Jamoamizning Toshkentdagi yig'ini davom etmoqda. Bugun futbolchilarimiz ikki mahallik mashg'ulotda qatnashishdi. Yanvar oyi boshida tibbiy ko'rikdan o'ta olmagan va tarkibga kechroq qo'shilgan futbolchilarimiz tibbiy ko'rikdan o'tishdi. Tarkibda aytarli o'zgarishlar kuzatilmaganligini aytib o'tish joiz. Yig'inda ishtirok etayotgan iqtidorli hujumchilarimizdan biri Ilhom Aliboev Namanganga qaytib yoshlarimiz safida "Hokim kubogi"da ishtirok etadi. Shuningdek, jamoamizda ko'rikdan o'tish uchun taklif etilgan Bobir Tillaboev (“Lokomotiv”), Shuhrat Hamidov (“Xotira-79”)lar “Hokim kubogi” musobaqasida yoshlarimizga yordam berishadi. Asosiy tarkib vakillari Toshkentdagi navbatdagi nazorat uchrashuvini 26 yanvar kuni “Buxoro” jamoasiga qarshi o'tkazishadi.
— deya xabar beradi uff.uz nashri.