Futbol — millionlar o'yini. Tabiiyki, butun dunyoda millionlab, kerak bo'lsa, milliardlab ishqibozlar mana shu sport turini berilib tomosha qilishadi. Bir so'z bilan aytganda, fanatizm butun dunyoda yaxshigina rivojlangan. Ammo... KLUBNI DEB JON BERGANLAR Evropada fanatizmning rivojlanib borishi bora-bora salbiy tus ola boshlagani hech kimga sir bo'lmasa kerak. Boisi, fanatlik shu darajada tomir otib ketgandiki, muxlislik insonlarning miyasini shu qadar zabt etgandiki, ishqibozlar real hayotdan uzoqlashib, faqat o'z suyukli klublarining nomi bilan yashay boshladi. Bu esa bora-bora ayanchli oqibatlarga olib keldi. «Manchester Yunayted»ni Ser Aleks Fergyusondan keyin qabul qilib olgan shotlandiyalik mutaxassis Devid Moesning peshonasiga muxlislar «qotil» tamg'asini yopishtirishdi. Boisi, uning davrida «MYu» ko'p bora mag'lubiyatga uchradi, ana shu mag'lubiyatlar esa, o'z navbatida, ayrim muxlislikka mukkasidan ketganlarning o'limiga sababchi bo'ldi. Bir muxlis o'zini osdi, boshqa biri zaharladi, xuddi hayotida «Manchester Yunayted»dan boshqa klub yo'qdek. Taassufki, bunday holatlar hozirda ham davom etmoqda. Endilikda Lui Van Gal boshqaruvi ostiga o'tgan «qizil iblislar»ning ashaddiy muxlislari jamoalarining mag'lubiyatini ba'zida o'zlarini o'ldirish bilan qarshi olishyapti. Xuddi uning o'limi jamoasiga yordam beradigandek. Aksincha, bunday tor fikrlaydigan muxlislar oilasini g'am, ayriliq komiga tashlab ketadi, xolos. BUTUN OILASINI GAROVGA QO'YGAN MANQURT 2014 yilgi jahon chempionatida Meksika terma jamoasi posboni Gilermo Ochoa o'zini yaxshi tomonlama ko'rsata olganidan xabardorsiz, albatta. Tabiiyki, bu uning muxlislari sonini keskin oshirdi. Biroq bu ishqibozlar orasida ham «so'qir»ga aylanganlari topildi. Xususan, Ispaniyaning «Malaga» klubi Gilermoni sotib olmoqchi bo'lganida «Ayachcho» muxlislari posbonni jamoadan ketmaslikka ko'ndirishga urinishdi. Eng ayanchli voqealardan biri esa ana shu vaqtlarda sodir bo'ldi, «Ayachcho»ning bir ishqibozi Ochoani jamoada saqlab qolish niyatida pul topish uchun o'z oilasi (xotini, farzandlari)ni garovga qo'ydi. Tasavvur qilyapsizmi, etti yot begona posbon uchun o'z farzandi, rafiqasini garovga topshirdi. Buning sababi, albatta, fanatizm. Fanatlik domiga tushganlarni, futbol uchun jonidan ham kechib yuboradiganlarni esa manqurt fanatlar deyishadi. RAZOLAT UYaSIGA AYLANGAN MAYDON Ayni damda shiddatli o'yinlar, kurashlarga guvoh bo'layotgan futbol maydonlari, ming afsuski, turli razil, qabih ishlarga ham makon bo'lmoqda. Xususan, Kongo Demokratik Respublikasida sodir bo'lgan mash'um voqea fikrimizning isbotidir. Mazkur davlatning Kinshasa shahrida mahalliy «Mazembe» va «Vita klub» jamoalari o'rtasida bo'lib o'tgan match mehmonlarning kichik hisobdagi g'alabasi bilan tugaydi. Oqibatda bu mag'lubiyatni hazm qila olmagan muxlislar o'yin yakunlangach, maydonga toshlar va boshqa buyumlarni uloqtirishadi. Xullas, ishqibozlikning chegaradan chiqishi yana katta janjalga sabab bo'ladi va hatto 15 nafar ishqiboz shu janjal oqibatida hayotdan ko'z yumadi. Sababi, muxlislar shu qadar jazavaga tushgan ediki, ularning ko'ziga hech narsa ko'rinmasdi. Bu yovuzlikning sababi esa yana o'sha fanatlik. XAZON BO'LGAN UMR Janubiy Afrika Respublikasida fanatizm ko'plab salbiy oqibatlarga olib kelmoqda. Mazkur qit'ada so'nggi paytlarda hakamlar o'yinlarni boshqarishdan bosh tortishyapti. Bunga esa, tabiiyki, jamoaga muxlislik qilish tuyg'usini yovuzlik tomon o'zgartirib yuborgan ishqibozlar sabab bo'lishmoqda. Ayniqsa, navbatdagi o'yinlardan birida matchni boshqarib borgan yosh hakamning muxlislar tomonidan kaltaklanib o'ldirilishi ancha shov-shuvga sabab bo'ldi. Ha, sizu biz muxlislik deya ta'riflayotgan tuyg'u bugungi kunda vahshiylik bilan ancha yaqinlashib ketmoqda. Yana bir misol. Rossiya va Chernogoriya o'rtasidagi o'yinlardan birida ham muxlislar maydonga portlovchi vositalarni uloqtirishdi. Hatto bu rossiyalik posbon Akinfeevning og'ir ahvolga tushishiga ham sabab bo'ldi. Tribunalarda janjal ko'tarayotganlarning esa boshqalarning ahvoli, qilayotgan harakatlarining futbolchilarga qanchalik zarar etkazishi zarracha ham qiziqtirgani yo'q edi. Bir so'z bilan aytganda, ishqibozlar insoniylik qiyofalarini yo'qotishgandi. O'ZIMIZNING IShQIBOZLAR Davomi quyidagi linkda.
— deya xabar beradi uff.uz nashri.