Qiziq bir holatdamiz, JCh—2018 yo'lidagi asosiy raqiblarimiz Qatar, Xitoy, Eron. Futbolchilarimizni ham asosan shu mamlakat klublari sotib olmoqda.
Odil Ahmedovning Xitoy klubiga o'tishi qanchalik quvontirgan bo'lsa, Xitoy futbol federatsiyasining yangi qarori kishini shunchalik cho'chitib qo'ydi. Bunga qadar maydonda bir nafar osiyolik va 3 nafar xorijlik futbolchi harakat qilishi mumkin edi. Endi esa osiyolik yoki xorijlik farqi yo'q — 3 nafar ajnabiy maydonda to'p suradi, qolgani xitoyliklar bo'lishi kerak.
Xitoy futbolini ko'tarish uchun tashlangan qadam sifatida e'tirof etildi bu. Legioner futbolchilarni jalb qilayotganklublar miyasini ozgina ishlatishi kerak bo'ladi. Birinchi navbatda, sifatlisini va jamoaga foydasi tegadiganini izlashi kerak. Ikkinchi tomondan esa ularning og'ziga siqqanini berish shart emas, bu pulni suvga oqqizishdan boshqa narsa emas deyildi sportga javobgar tashkilot bayonotida.
Oddiy misol, “Guanjou Evergrand” safidagi legionerlar juda dahshatli bo'lib ko'rinmaydi. Shunga qaramay, klub olti yildan buyon chempionlikni hech kimga bermaydi. O'tgan mavsum oldidan asosiy raqobatchisiga argentinalik Dario Konkani sotib ham, yakunda chempionlikni nishonladi. Muhimi — tarkibdagi legionerlar foydali ish koefitsenti bo'yicha mamlakatning qolgan jamoalariga o'rnak bo'la oladi.
Hozir gap bu haqda emas. Biz ularning muammosi bilan yashashga majbur emasmiz. Biroq bizning uch nafar futbolchi Xitoy chempionatida to'p suradi. Mana shunisi o'ylantirib qo'ymoqda. Maydonda osiyolik futbolchining bo'lishi ko'ngilni xotirjam qilayotgan bir paytda, endi ularga joy kafolatlanmaydi.
O'zbekiston milliy terma jamoasidagi eng kuchli futbolchi Odil Ahmedov. Uning zaxirada o'tirib qolishini tasavvur qilish qiyin. Biroq Xitoy futbol federatsiyasining qarori Villash-Boashni shunga majbur qilishi mumkin. Aytaylik, uning qo'l ostida Ahmedovdan tashqari Elkesen, Xalk, Oskar va Karvalyu bor. Portugaliyalik mutaxassis Ahmedovni boshlang'ich tarkibga kiritishi uchun, shulardan ikki nafarini zaxirada qoldirishga majbur bo'ladi. “Shanxay SIPG” Ahmedov bilan uch yillik shartnoma tuzib qo'yganini inobatga olsak, vaziyat qo'rqinchliroqdek ko'rinadi. Sizning bu besh futbolchidan qaysi biri boshlang'ich tarkib uchun asosiy da'vogar?
Oskar ham, Xalk ham zaxiraga o'tirib qolish uchun Shanxayga ko'chib o'tmagan. Elkesen va Karvalyu bilan raqobatlashish esa oson emas. Xitoy futbol federatsiyasi shunday qarorga kelishi haqida bir mavsum oldin ogohlantirib ham o'tirmadi. Hamma safiga yangi futbolchilarni qo'shib olayotgan bir paytda, ayrimlar safini to'ldirib bo'lganida qo'qqisdan qaror chiqarib qo'ya qoldi. Tasavvur qiling, Villash-Boash jamoani tarkibdagi rotatsiya bilan o'ynata boshladi. Ahmedov 2 ta o'yinning birida maydonga tushib turdi ham deylik. Biroq bunday holatda futbolchi undan kuchli bo'lmagan va Xitoy terma jamoasida to'p suradigan raqobatchisidan o'yin amaliyoti borasida ortda qola boshlaydi. Villash-Boash Ahmedovning qandaydir Suy Lidan kuchli ekanini bilsa-da, limitdan kelib chiqib o'sha Lini tarkibga kiritishga majbur bo'ladi. Bu bilan Marchello Lippining shogirdida o'yin amaliyoti etarli bo'ladi, Samvel Babayan esa bu borada muammoga duch keladi.
“Chanchun Yatai” va “Beytszin Goan” klublari safida ham bir qator legioner futbolchilar bor. Ularning maydonga tushishi Anzur Ismoilov hamda Egor Krimetsning imkoniyatlarini kamaytirib yubormasligiga hech kim kafolat bermaydi. Bu futbolchilarni osiyolik legioner uchun ajratilgan kvota alohida asrab kelayotgan bo'lishi katta ehtimol edi.Mana endi tasavvur qiling, Xitoy Super ligasida o'ynayotgan uch nafar o'zbekistonlik zaxirada qolib ketsa, bu hol O'zbekiston milliy terma jamoasiga qanday ta'sir o'tkazadi. Ularning har uchalasi ham Babayan tuzadigan tarkibning almashtirib bo'lmas figuralari hisoblanadigan bir paytda yana.
Vaziyat shunday tus olsa, Samvel Babayan ham qo'shimcha kuchlarga tayyor turishi kerak. Boshqa iloji yo'q. Faqatgina 11 nafar futbolchining “qonini so'rib”, ularning kuchi bilan mundialga borish qiyin. Tanlov uchun mutaxassisda variantlar yo'q emas. Jeparovning yoshi o'tib qolayotgan bo'lsa-da, tajribasi katta. Masalan “Istiqlol” bejizga uning uchun 500 ming dollar va'da qilmadi. Shuncha pul to'lab, zaxiraga o'tkazib qo'ymaydi. Eron chempionati esa O'zbekistonnikidan ancha kuchli.
Fozil Musaev, Sanjar Tursunov va Temurxo'ja Abduxoliqovga ham jiddiy e'tibor qaratadigan vaqt keldi. Yaponiya Jey ligasida to'p surish har kimning ham qo'lidan kelmaydi. Qatar Yulduz ligasi ham Oliy ligadan o'zib ketganini inobatga olsak, Babayan printsiplaridan voz kechib turishiga to'g'ri kelsa kerak. Agar Abduxoliqov “Al-Jaish”, “As-Sadd” kabi klublar darvozasiga gol urishni boshlasa, ish yanada olg'a siljishi mumkin.
Shunday deyman-u, biroq bunga o'zimda ishonch kam. Ya'ni, Babayan boshqalarga ham jiddiyroq e'tibor qaratishiga. FIFA so'rovnomasida Krishtianu Ronalduni kuchli uchlikka ham kiritmaydigan murabbiy, Yaponiya yoki Qatarda o'ynaydigan o'zbekistonliklarning qadriga etishi mumkinmi? Maqolani tabassum bilan yakunlayman.
Diyor IMOMXO'JAEV
— deya xabar beradi uff.uz nashri.