Aleksandr Lobanov milliy terma jamoaning asosiy darvozaboni sifatida tanlanganida, bunga ko'p e'tiroz bildirildi. Mana, Sasha o'tgan vaqt davomida asosiy tarkibda 3ta uchrashuv o'tkazishga ulgurdi. Ta'kidlash lozim, shu o'yinlar tanqidlar bo'hroni susayishi uchun etarli bo'ldi.
Ammo darvozabonga nisbatan ishonch hamon mustahkam emas, chunki unga tanqidiy ko'z bilan qarayotganlar hali ham ko'p. Boz ustiga, «Paxtakor» so'nggi turlarda dam-badam ochko yo'qotmoqda. Xullas, Lobanov bilan suhbatimiz aynan oliy ligadagi kurash va milliy terma jamoa mavzusini qamrab oldi.
«PAXTAKOR», KURASh VA MAOSh
- Aleksandr, «Bunyodkor»ga qarshi uchrashuv haqida nima deya olasiz? Bu o'yinda penaltini to'sganingizga qaramay, jamoangiz yakunda mag'lubiyatga uchradi.
 - Aslida tabiiyki, g'alaba qozonib, chempionlik masalasini nisbatan oydinlashtirib olishni istagandik. Afsuski, mag'lubiyatga uchradik. Alam qiladi, albatta, biroq shunga qaramay, hamon peshqadammiz, ya'ni hammasi o'z qo'limizda. Mavsum yakunlanishiga oz qoldi. Oxirgi turlardan o'rin olgan har bir o'yinimizni finalga qiyoslash mumkin. Mana shu finallarda g'alaba qozonsak, chempionlik yana bizga nasib etadi.
- Ular orasida «Nasaf»ga qarshi kechadigan bahs muhim hisoblansa kerak...
- Yo'q, hozirgi holatda hammasi biz uchun g'oyat muhim. O'zi 20-turdan keyinoq har bir uchrashuvga finalga qaragandek munosabatda bo'la boshlaganmiz. Shunday ekan, «Nasaf»ga qarshi o'ynaymizmi yoki boshqasiga - farqi yo'q - baribir, faqat g'alaba uchun maydonga tushishimiz shart.
- «Bunyodkor» bilan uchrashuv yakuniga etgach, jamoangiz bosh murabbiyi No''mon Hasanov maosh masalasida muammo borligi haqida gapirdi. Bu narsa jamoa kayfiyatiga salbiy ta'sir o'tkazmayaptimi?
- Kayfiyatni tushiradigan jihatlar ko'p, ammo ularning barchasi o'yin­da mutlaqo unutiladi. Maydonga tushdingmi, uchrashuvdan oldin xayolingni band qilgan hamma narsani chetga surasan. Hozir chempionlik masalasi hal bo'lmoqda, eng muhimi - shu. Qolgani vaqt o'tishi bilan izga tushar...
- Klubingiz «Metallurg»ni 3:2 hisobida mag'lubiyatga uchratgach, turli gap-so'zlar urchidi. Ya'ni ushbu o'yin O'FF va Kelishilgan o'yinlarga qarshi kurashish qo'mitasi tomonidan shubhali, deb topildi. Bu haqda nima deya olasiz?
- Bular bevosita futbolga aloqador emas, balki uning atrofidagi muhokamalardir. Men esa, odatda maydon tashqarisidagi gap-so'zlarga e'tibor qaratmaslikka harakat qilaman. Zero, bizning vazifamiz ta­yin - shunchaki, maydonga tushib, g'alaba uchun to'p surish. Xullas, savolingizga bundan ortiq javob qaytarolmayman.
TERMA JAMOA
- Aleksandr Lobanov O'zbekiston milliy jamoasiga chaqirilganidan so'ng ko'plab e'tirozlar yangradi. Bunga munosabatingiz?
- Gap terma jamoa haqida ketar ekan,  har doim e'tiroz bo'lishi tayin. Chunki muxlislar juda talabchanlar. Hattoki, eng iqtidorli futbolchi ham terma jamoaga kelganida, boshqacha o'yin namoyish qilishi shart. Tabiiyki, men ham o'z ishimni imkon qadar yaxshi bajarishga urinmoqdaman, xolos. Bahoni esa siz - jurnalistlar berasizlar, shuningdek, muxlislar va mutaxassislar ham.
- Siz darvozani qo'riqlagan 3ta o'yinda ham terma jamoamiz g'alaba qozondi. Ammo Filippindagi  uchrashuvda qo'yib yuborgan golingiz...
- Darvozabon uchun eng qiyini - to'psiz qolish. Raqib ketma-ket hujum uyushtirib turganida, o'yinga kirishib ketish osonroq. Ammo to'psiz qolsang, bu ishni uddalashing ancha qiyin bo'ladi. Filippinliklarga qarshi uchrashuvdan oldin Toshkentda yamanliklar bilan o'ynadik. O'sha o'yinda to'p men tomon deyarli etib kelmadi. Shuningdek, Filippinda ham shunga yaqinroq holat kuzatildi. Boz ustiga, bu o'yinlar men uchun dast­labkilari edi. Shu sabablimi, hayajonni bosib olishim qiyinroq kechdi.
Filippinlik futbolchi jarima zarbasini amalga oshirayotganida esa, hayajon ta'sirida tashabbusni o'z qo'limga olishga urindim, chog'i... Bu harakatim kulguli golga olib keldi. Ammo o'sha qo'pol xato o'zimga kelib olishim uchun katta yordam berdi. Chunki men cho'chigan holat ro'y berib ulgurgan edi. Bosh­qacha aytsam, o'shangacha aynan shunday xato qilib qo'yishdan qo'rqayotgandim. Keyin esa o'zimga nido qildim: «Mana, sen cho'chigan narsa ro'y berdi. Endi buyog'iga dadilroq o'yna». Darvozabon uchun xatodan so'ng o'ziga kelib olish juda muhim. Xayriyatki, men shu ishni uddalay oldim. Yodingizdami, o'sha goldan so'ng raqib yana bir xavfli hujum tashkil etgan va zarbani ajoyib tarzda to'sishga erishgandim.
Davomi InterFUTBOL gazetasi blogida.
— deya xabar beradi uff.uz nashri.