Yakunlangan haftada O'zbekiston milliy terma jamoasining xorij klublarida faoliyat olib borayotgan legioner futbolchilari mahalliy chempionatlar doirasidagi o'yinlarda ishtirok etdi.
Xitoy
Xitoy Superligasida chempionatning so'nggi — 30-tur uchrashuvlari bo'lib o'tdi.
O'zbekiston milliy terma jamoasi himoyachisi Anzur Ismoilov faoliyat olib borayotgan “Chanchun Yatay” jamoasi “Guychjou Jenxe” maydoniga safar uyushtirdi va 2:2 hisobida durang o'ynadi.
Uchrashuvda Anzur Ismoilov odatdagidek boshlang'ich tarkibda maydonga chiqdi va to'liq 90 daqiqa o'ynadi.
Mazkur durangdan so'ng “Chanchun Yatay” hisobidagi ochkolar soni 35 taga etdi va jamoa musobaqa jadvalining 8-pog'onasida turnirni yakunladi.
Ukraina
Ukraina chempionatining 12-turida O'zbekiston milliy terma jamoasi yarim himoyachisi Sanjar Tursunov to'p suradigan Poltavaning “Vorskla” klubi mehmonda “Aleksandriya” jamoasiga qarshi maydonga tushdi. Uchrashuv1:1 hisobidagi durang natija bilan yakunlandi.
O'zbekistonlik futbolchi Sanjar Tursunov bahsni boshlang'ich tarkibda boshlab, 77 daqiqa maydonda to'p surdi. Uchrashuvda Tursunov hakam tomonidan ogohlantirish oldi. O'tkazilgan 12 turdan keyin “Vorskla” turnir jadvalining 5-o'rinida bormoqda.
Rossiya
Rossiya chempionatining 14-turidan o'rin olgan “Krilya Sovetov” hamda “Krasnodar” klublari o'zaro to'qnash kelib, unda 0:4 hisobi qayd etildi va krasnodarliklarning g'alabasi bilan yakunlandi. Uchrashuvda gollarni Mamaev, Smolov, Mamaev va Ari kiritdi. O'zbekiston milliy terma jamoasi yarim himoyachisi Odil Ahmedov 90 daqiqa davomida maydonda harakat qildi.
Ushbu tur doirasidagi boshqa bir o'yinda Moskvaning “Lokomotiv” klubi “Kuban” uyiga safar uyushtirib, yirik hisobda mag'lub bo'ldi. O'yida 6:2 hisobi qayd etildi. O'zbekiston milliy terma jamoa himoyachisi Vitaliy Denisov uchrashuvni asosiy tarkibda boshlab, uni to'liq o'tkazdi.
— deya xabar beradi uff.uz nashri.