2016 yili Rio-de-Janeyro shahri (Braziliya)da o'tkaziladigan XXXI yozgi Olimpiada o'yinlariga yo'llanma olgan sportchilarimiz safi yana bittaga kengaydi.
Qatar poytaxti Doha shahrida o'tkazilayotgan Jahon Gran-Prisining navbatdagi bosqichida hamyurtimiz Ra'noxon Amanova 200 metr masofaga kompleks usulda suzish bo'yicha musobaqada 2:13,08 soniya natija qayd etib, “Rio-2016” o'yinlariga litsenziyani qo'lga kiritdi (ushbu masofada Olimpiada o'yinlarining yo'llanmasi uchun belgilangan me'yor 2:14,20 soniyani tashkil etadi).
Bugun Qatarda o'tkazilayotgan Jahon Gran-Prisida yana bir yurtdoshimiz Vladislav Mustafin 100 metr masofaga brass usulda suzish musobaqasida startga chiqadi.
Jahon Gran-Prisining navbatdagi bosqichi 6-7 noyabr kunlari BAAning Dubay shahrida o'tkaziladi.
O'zbekiston suzish federatsiyasi matbuot xizmatidan ma'lum qilinishicha, Doha va Dubay shaharlarida o'tkaziladigan Jahon Gran-Prisiga jami 9 nafar sportchimiz yo'l olgan.
Ma'lumot uchun. Ra'noxon Amanova 2012 yili London shahri (Buyuk Britaniya)da bo'lib o'tgan XXX yozgi Olimpiada o'yinlarida ham Vatanimiz sharafini himoya qilgan. Shavkat Jalilov
Manzil: O'zbekiston Milliy Olimpiya qo'mitasi matbuot xizmati

— deya xabar beradi uff.uz nashri.