Farg'onaning “Neftchi” jamoasi yangi mavsum avvalida o'z tarkibiga yangi futbolchilarni qo'shib olishda davom etmoqda. Avvalroq farg'onaliklar “So'g'diyona”dan Muzaffar Muzaffarov xamda “Navbahor”dan Akram Bahriddinov singari futbolchilarni o'z safiga jalb etgan edi. Yana bir muhim yangilik. Dekabr oyidan beri “Neftchi” yig'inida ishtirok etib kelayotgan sobiq “Metallurg” futbolchisi Said Abdujabborov “Neftchi” futbol klubi bilan 2 yillik shartnoma imzolaganini rasman ma'lum qilamiz. Qayd etish kerakki, Abdujabborov Farg'ona futboli tarbiyalanuvchisi hisoblanib so'nggi yillarni bekobodliklar tarkibida muvaffaqiyatli tarzda o'tkazib kelayotgan edi. Shuningdek tajribali hujumchi, Farg'ona futbolining yana bir etakchi a'zosi Mo'ydin Mamazulumov ham “Neftchi” jamoasi bilan 1+1 ko'rinishidagi kelishuvga erishdi. O'tgan mavsumni ijara asosida “Istiqlol” jamoasi tarkibida o'tkazib Farg'ona shahri jamoasini O'zbekiston chempionati Birinchi ligasiga yo'l olishida o'zining ko'plab gollari bilan yordam bergan umidli va yosh hujumchi Rizo Ayvazov ham jamoaga qaytarildi. To'purar hujumchi esa “Neftchi” jamoasi bilan 2 yillik bitimga imzo chekdi.
— deya xabar beradi uff.uz nashri.