Bugun rasman yangi mavsum boshlanadi. Uni «Nasaf» ochib beradi - OChL-2017 saralashi doirasidagi o'yin bilan. Raqib - «Al-Hidd» biz uchun ancha begona. Harqalay, Bahrayn klublari bilan ko'p to'qnash kelmaganmiz. Ammo Bahrayn chempionati uncha kuchli emasligi va uchrashuv «Bunyodkor» stadionida o'tkazilishini inobatga olsak, qarshiliklarda keyingi raundga chiqish imkoniyati ko'proq, shubhasiz. Ammo nimagadir ishonish uchun avvalo, asos kerak. Xo'sh, bizdagi asos nima? HOZIRGI «NASAF» Ayni paytdagi «Nasaf» avvalgi holatidan ancha farqlanadi. Agarda o'tgan mavsumlar jamoani Artur Gevorkyansiz tasavvur qilolmagan bo'lsak, endi turkmanistonlik futbolchisiz ham Qarshi klubida hayot davom etishini tushunib etdik. Gevorkyan o'rniga bir yo'la 3 nafar legioner taklif etilgandi - Dragan Cheran, Ognen Krasich va Igor Golban. Ular avvalgi mavsum jamoa­ga nechog'li mos kelishlarini isbotlab ulgurdilar. Cheran va Golban yangisini ham qarshiliklar safida boshlashadi. Biroq shuni alohida ta'kidlash joiz, hozirgi «Nasaf» avvalgidan farqli o'laroq, legionerlar emas, balki mahalliy futbolchilarga ko'proq tayanmoqda. Boz ustiga, asosan yosh iqtidorlarga. Ha, klubda avlodlar almashinuvi davom etyapti. O'tgan yili tarkibda bir qator iste'dodlar ko'zga tashlanishdi - Aziz G'aniev, Sharof Muhiddinov va Bobir Abduxoliqov... Odil Hamrobekovni taniganimizga esa ancha bo'ldi. Shuningdek, yangi mavsumda Islom Kenjaboevning kashfiyotga aylanishi kutilmoqda. Yaxshigina tezlik va texnikaga ega bu yigitni eslab qoling. KETGANLAR O'z o'rnida, jamoa bir qator etakchilar bilan xayrlashganini ham aytish lozim. Bu yildan e'tiboran, «Nasaf»da transfer siyosati o'zgardi. Klub yillar davomida bitta tarkibni saqlab turishi bilan tanilgandi. Biroq endi vaziyat boshqacha. Avvalgi mavsumning davralar oralig'ida Artur Gevorkyan jamoadan ketgandi. Chempionat yakuniga etgach esa, Shuhrat Muhammadiev va Azamat Allaniyozov ham «Nasaf» bilan xayr­lashishdi. Muhimi, murabbiylar shtabi yo'qotishlar o'rnini qoplaganini bemalol aytish mumkin. Ya'ni nomlari zikr etilgan legionerlar va yosh iqtidorlar ketganlar o'rnini bildirmasliklari lozim. Umuman, «Nasaf»da teng kuchli 2ta tarkib shakllantirilmoqda. Jamoa uchun Shuhrat Muhammadievning «Lokomotiv»ga ketgani ancha og'riqlidir, qaysidir ma'noda. Har holda, bunday saviyadagi futbolchi o'rnini darhol bosish qiyin masala. Ammo klub  ushbu yo'qotish o'rnini to'ldirib ulgurdi. Ya'ni «Bunyodkor» sharafini himoya qilib kelgan Akmal Shorahmedov endi faoliyatini «Nasaf»da davom ettiradi. ShORAHMEDOV Akmal vaqtida O'zbekiston milliy jamoasida etarlicha o'ynagan va katta tajriba to'plagan himoyachi hisoblanadi. U 30 yoshni qoralab qo'ygan bo'lsa-da, o'tgan mavsum taassurotlariga tayanib aytsak, avvalgi mahoratini hali yo'qotgan emas. Maqola davomi: www.interfutbol.uz saytida
— deya xabar beradi uff.uz nashri.