Zamonamizning eng kuchli futbolchilaridan biri – Krishtianu Ronaldu ayni vaqtga qadar butun faoliyati davomida 40 ga yaqin rekord o'rnatgan. Portugaliyalik futbolchining so'nggi rekordlaridan biri Ispaniya chempionatida penaltilar tepish borasidadir. CR7 bu borada Ugo Sanchesga etib oldi – 56 ta. Biz esa shu munosabat bilan, Ronaldu tepgan eng esda qolarli penaltilarni e'tiboringizga havola etamiz. Portugaliya – Angliya 01.07.2006 U paytlari Ronaldu hozirdagi singari yulduz emas edi. Terma jamoada Rikardo Karvalo, Deku va Luish Figular bosh yulduz edilar. Biroq bu Krishtianuning boshlang'ich tarkibda maydonga tushishida zarracha ham halal bermagan. 2006 yil Portugaliya mundialga Evropaning amaldagi vitse-chempioni sifatida tashrif buyurgan edi. Guruh bosqichida Meksika, Angola va Eron kabi termalarni ortda qoldirib chiqqan Luiz Felipe Skolari jamoasi 1/8 finalda Gollandiya bilan juda ham qiyin o'yin o'tkazadi. Ronaldu va uning sheriklari maydonda bir kishi kam bo'lib qolgan bo'lsalarda, uchrashuvda Portugaliya minimal hisobda g'alaba qozonadi va chorak finalda Angliyaga ro'baro keladi. O'z navbatida inglizlarda ham Bekxem, Eshli Koul, Jerrard, Ouen, Lempard va Runi singari kuchli futbolchilar bor edi. Qizig'i na yuqorida sanagan futbolchilarimiz va na boshqalar 120 daqiqa davomida gol kiritishning uddasidan chiqa bilishmagan edi. O'yinning 62-daqiqasiga kelib inglizlar 10 kishi bo'lib qolishadi. Rikardo Karvaloga nisbatan ishlatilgan qo'pollik uchun Ueyn Runi qizil kartochka bilan “siylanadi”. Penaltilar seriyasida “uch sherlar”ning “nuqta”ga yaqinlashgan 4 futbolchisidan faqat biri mo'ljalni aniq oladi. Portugaliyaliklardan xal qiluvchi zarbani aynan Krishtianu amalga oshiradi va sheriklarini “uyaltirib qo'ymaydi”. Shu tariqda Portugaliya yarim finalga yo'l oladi. Ushbu bosqichda esa Skolari shogirdlari Frantsiyadan mag'lub bo'lishadi. Yakunda Portugaliya mundialda 4-o'rinni egallaydi. “Tottenxem” – “Manchester Yunayted” 04.02.2007 Kelgusi mavsumda esa Ronaldu “Old Trafford”ning bosh yulduziga aylanadi. Aynan o'sha vaqtlarda portugaliyalik futbolchi “simulyant” degan nomni oladi. Uning xatti-harakatlarini barcha turli xil e'tirof etar va kimlardir uning bu muvaffaqiyatini aynan simulyatsiya bilan bog'lar edi.  2007 yil fevral oyining boshlarida “Tottenxem” bilan bahsda Ronaldu shubhali penalti “ishlaydi” va uni o'zi aniq tarzda bajaradi. O'sha mavsum yakunida esa Krishtianu Angliya FA tomonidan APLning eng yaxshi yosh va eng yaxshi futbolchisi deb topiladi. “Manchester Yunayted” – “Chelsi” 21.05.2008 Yanagi yil esa “MYu” EChL finaliga chiqadi. Moskvada o'tgan finalda “qizil iblislar” “Chelsi” bilan bosh sovrin uchun kurash olib boradi. 26-daqiqada Ronaldu Skoulz tomonidan etkazib berilgan to'pni boshi bilan darvozaga “joylab” qo'yadi. Taym oxirida esa Lempard muvozanatni tiklaydi va barcha masala penaltilar seriyasida aniqlanadi. Penaltilar seriyasida esa Ronaldu Petr Chexni “alday olmaydi” va “nuqta”dan adashadi. Yakunda esa EChL kubogi baribir Manchesterga ketadi. Maqolaning davomi penalti.uz saytida
— deya xabar beradi uff.uz nashri.