Yangi mavsumga tayyorgarlikning hal qiluvchi bosqichini Antaliyada olib borayotgan «Lokomotiv» futbol klubining manzilga etib kelganiga bugun uch kun bo'ldi.
Odatga ko'ra bugungi mashg'ulot ham ikki mahal o'tkazildi. Futbolchilar ertalab trenajyor zalida mashq qilgan bo'lishsa, tushdan keyin futbol maydonida mashg'ulot o'tkazishdi.
Bugungi mashg'ulotga uch nafar yangi futbolchi qo'shildi. Bular — Muhammad Kone, Nore Krizo va Murod Bobojonov. Bu futbolchilar kecha tunda mehmonxonaga etib kelishgani bois murabbiylar biroz dam berishdi. Shu sabab mashg'ulot paytida ularga ortiqcha yuklamalar berilmadi.
Jamoaning maydondagi mashg'uloti ham qizg'in kechdi. «Temiryo'lchilar» bir yarim soat mobaynida avval chigalyozdi, undan keyin to'p bilan mashqlarni bajarishdi. Shuningdek, ikki tarkibga bo'lingan holda futbol o'ynashdi.
Kechki payt esa futbol nazariyasi bo'yicha murabbiylardan saboq olindi. Bunda «Lokomotiv»ning 2017 yil hisobidan birinchi rasmiy o'yindagi raqibi «Al Taavon» (Saudiya Arabistoni) ishtirokidagi bahs o'rganib chiqildi. Eslatib o'tamiz, Osiyo chempionlar ligasining 1-turidan o'rin olgan «Al Taavon» — «Lokomotiv» uchrashuvi 20 fevral kuni o'tkaziladi.
Antaliyadagi dastlabki o'rtoqlik uchrashuvi 3 fevral kuni Turkmanistonning «Oltin Asr» klubi bilan bo'ladi. Shu bois ertaga, 2 fevral kuni jamoa bir mahal, faqat kechki payt mashg'ulot o'tkazadi.
— deya xabar beradi uff.uz nashri.