Milliy olimpiya qo'mitasining majlislar zalida O'zbekiston Milliy paralimpiya Assotsiatsiyasi o'zining navbatdagi Bosh Assambleyasi hisobot-saylov konferentsiyasini o'tkazdi. Konferentsiyani Milliy olimpiya qo'mitasi Bosh kotibi Oybek Kasimov olib bordi.
Unda 2013—2016 yillar davomida assotsiatsiya tomonidan amalga oshirilgan ishlar yuzasidan hisobot berildi hamda assotsiatsiya rahbariyati va ijroiya qo'mitasining yangi tarkibi saylandi.
Ma'lumki O'zbekiston Milliy paralimpiya Assotsiatsiyasi jismoniy imkoniyati cheklangan yoshlarni jismoniy tarbiya va sportga keng jalb etish, ular orasida paralimpiya harakatini rivojlantirish, xayotga qiziqishini oshirish, iqtidor va salohiyatini ro'yobga chiqarish borasida insonparvarlik faoliyatini amalga oshirib kelmoqda.
2016 yil Braziliyaning Rio-de-Janeyro shahrida bo'lib o'tgan XV Paralimpiya o'yinlari O'zbekiston delegatsiyasi uchun har qachongidan omadli bo'lib, 32 nafar sportchi bilan ishtirok etgan terma jamoamiz yakunda 31 ta medalni qo'lga kiritdi va medallar jamg'arish koeffitsenti bo'yicha XV Paralimpiya o'yinlarida eng yaxshi natijani qayd etdi.
Endigi vazifa mamlakatimizda jismoniy imkoniyati cheklangan yoshlarni sportga yanada ko'proq jalb qilish, ularga jamiyatimizda o'z o'rnilarini topishlariga, iqtidor va salohiyatlarini to'liq ochib berishlariga yordam berish va albatta 2020 yili Tokioda bo'lib o'tadigan navbatdagi Paralimpiya o'yinlarida natijalarni yanada yaxshilashga e'tibor qaratishdan iboratdir.
Bosh Assambleya yig'ilishida shuningdek Assotsiatsiya rahbariyatining yangi tarkibi saylandi. Jumladan, O'zbekiston Milliy paralimpiya Assotsiatsiyasi raisi etib Ulug'bek Sunnatov, uning birinchi o'rinbosari etib Umid Ahmadjonov saylanishdi.
Assotsiatsiya raisi o'rinbosarlari vazifasini shuningdek, Bahodir Ahmedov, Asatilla Salimov va Muxtorxon Toshxo'jaevlar bajaradigan bo'lishdi.
O'zbekiston Milliy olimpiya qo'mitasi
matbuot xizmati
— deya xabar beradi uff.uz nashri.