Birinchi Liganing 15-turida "Oq-tepa" jamoasi uyda "Mash'al-2" (0:0)ni mag'lub qila olmadi. Natijada, "Oq-tepa" chempionat yakunlanishiga bir tur qolganida peshqadamlikni "Obod"ga berib qo'ydi. Bu esa klubning yo'llanmadan mahrum bo'lishiga sabab bo'lishi mumkin. "Mash'al-2" bilan bellashuvdan keyin "Oq-tepa" yarim himoyachisi Anvar Rahimov bilan suhbatlashdik.
- "Mash'al-2" bilan o'yindagi durang natija bo'lishiga nima sabab bo'ldi?
- Rosti, bu o'yinni yutishni juda istagandik. Shuning uchun ham g'alabani istab, maydonga chiqqandik. Lekin raqib jamoaning butunlay himoyaga yotib olganligi bois, gol kiritishni ilojini qila olmadik. Vaziyatlar yaratildi. Qilingan urinishlar esa besamar ketdi. Shu boisdan g'alaba qozona olmadik Aslida jamoamiz yaxshi o'ynadi. Gol bo'lmasa, ming hujum qiling, foydasiz ekan.
- Bahsning bunday bo'lishini kutganmidingiz?
- Bilasizmi, birinchi ligadagi barcha raqiblarni hurmat qilamiz. U birinchi o'rinda bo'ladimi yoki oxirgi pog'onadami, raqib sifatida qaraymiz. "Mash'al-2" yaxshi himoyalandi va shuning evaziga gol ura olmadik. Butunlay himoyaga yotib olgan jamoani darvozasini ishg'ol qilish qiyin bo'lishini barcha yaxshi biladi.
- "Oq-tepa" chempionat tugashiga bir tur qolganida peshqadamlikni "Obod"ga berib qo'ydi. Bu kayfiyatga ham ta'sir qilgandir?
- Bo'lmasamchi! Axir, biz "Obod"dan ochkolar borasida ancha oldinda edik. Lekin oxirgi turlarga kelib, peshqadamlikni berib qo'yishimiz alamli holatni keltirib chiqaradi. Kayfiyatimizni tushurib yuborishi aniq. Biz so'nggi turlarga qadar umid qilishda davom etamiz.
- Endilikda "Oq-tepa" safarda "Xorazm"ni enggan taqdirida ham "Obod" yutib ketsa, yo'llanmani ilib ketadi. Buni bilib turgan bo'lsangizlar kerak?
- Ha. Biz so'nggi turlarda ham vaziyat ijobiy tomonga o'zgarishini istab, kayfiyatni ko'tarmoqdamiz. Ayni paytda ko'pchilik "Obod"ni yo'llanma olishiga ishonishmoqda. Ularda ajoyib imkoniyat yuzaga keldi. Lekin futbolda hamma narsa bo'lishi mumkin. Shuni inobatga olib, so'nggi turni ham yaxshi bo'lib qolishiga ishonamiz.
- Umuman olganda, jamoaning maqsadi oliy ligaga chiqishmi?
- Albatta. Jamoamiz rahbariyati barcha sharoitlarni yaratib berishgan. Maqsad esa bitta. Ya'ni klubni oliy ligaga olib chiqish hisoblanadi. Kelgusi yilda jamoa elita jamoalari qatorida bo'lishini ta'minlamoqchi. Biz shunday sharoitlardan kelib chiqib, yo'llanmani olish uchun o'ynaymiz.
— deya xabar beradi uff.uz nashri.