Xabaringiz bor bugun Ispaniya La Ligasining 21-turida “Selta” o'z maydonida Madridning “Real” klubini qabul qilishi kerak edi. Ammo, Galisiyada yuzaga kelgan bo'ron tufayli “Selta” klubiga tegishli “Balaydos” stadioni zarar ko'rdi. Ma'lumotlarga ko'ra, tabiiy ofat  o'yingoh tomining bir qismini uchirib ketgan. Yuqoridagi sabablarga ko'ra o'yin o'tkazilmasligi e'lon qilindi. Bu esa har ikkala jamoa uchun ham jiddiy qiyinchilik keltirib chiqarishi mumkin. Boisi, “Real” uchun ham, “Selta” uchun ham bahorgi taqvim juda ham tig'iz joylashgan. “Real” Chempionlar ligasida o'z yurishini davom ettirayotgan bo'lsa, “Selta” Evropa ligasida keyingi bosqichda o'ynaydi. Marca nashri jurnalisti qoldirilgan o'yin qachon o'tkazilishi mumkinligi borasida 4ta variantni keltirib o'tdi. Unga ko'ra: 1. “Selta” Evropa ligasining 1/16 finalida Donetskning “Shaxtyor” klubiga mag'lub bo'lib, musobaqani tark etsa, qoldirilgan o'yin 15 mart kuni bo'lib o'tishi mumkin. 2. 12 yoki 19 aprel kuni agar “Real” EChLning 1/8 finalida “Napoli” to'sig'idan o'ta olmasa. 3. Martning oxiri yoki aprelning boshida. Ikkala jamoa kelishgan holda FIFA kunlaridan so'ng ushbu o'yinni o'tkazishlari mumkin. 4. 17 may kuni musobaqaning so'nggi tur oldidan. Ishonamizki yuqoridagi kunlarning qaysi birida bo'lmasin har ikkala jamoa muxlislar kutgan o'yinni namoyish etib berishadi.
— deya xabar beradi uff.uz nashri.