Ertaga "Lokomotiv"ning asosiy tarkibi juda muhim uchrashuvda maydonga chiqadi. Jamoamiz o'z maydonida "Mash'al"ni qabul qiladi. Bu uchrashuvda "temiryo'lchilar"ni faqat va faqat g'alaba qoniqtiradi. Chempionlik uchun kurashayotgan "Lokomotiv" uchun Qarshida parallel tarzda start oladigan "Nasaf" - "Paxtakor" uchrashuvi ham juda muhim. Agar bu o'yinda "Nasaf" g'alaba qozongudek bo'lsa yoki durang o'ynasa, biz yutgan taqdirda birinchi o'ringa chiqib olamiz. "Nasaf" O'zbekiston Kubogini qo'lga kiritgach, keyingi ikki bahsda durang o'ynadi. Avvaliga "Bunyodkor" bilan, keyin safarda "Dinamo" bilan. Ammo o'ylaymizki, "Nasaf" uchun hali mavsum tugagani yo'q va ertangi o'yinda bor kuchini ishga solgan holda faqat g'alabani ko'zlab harakat qiladi. "Lokomotiv"ning chempion bo'lishi hozir to'liq o'z qo'lida emas. Ko'p jihatdan Qarshidagi bellashuv ham hal qiluvchi ahamiyatga ega. Shunday ekan, ertaga soat 14:00dan boshlab har ikkala uchrashuvni diqqat bilan kuzatamiz. Eslatib o'tamiz "Lokomotiv" - "Mash'al" va "Nasaf" - "Paxtakor" bahsi "Sport" TV orqali bir xil vaqtda 14:00 to'g'ridan-to'g'ri efirga uzatiladi.
— deya xabar beradi uff.uz nashri.