Yangi ochilayotgan futbol kanali millionlar o'yinining o'zbekistonlik muxlislari uchun ayni muddao bo'ldi. Ular bu kunni orziqib kutdi. Taxminan mart oyida “Futbol-TV” telekanali o'z faoliyatini boshlaydi.
Bu haqdagi gap-so'zlar o'tgan yilning yarmidayoq palak yozgandi. UzReport Angliya va Ispaniya chempionatlari translyatsiyasini yo'lga qo'yganidan keyin kanalning futbolga ixtisoslashgan sharhlovchilari alohida ajralib chiqishi kutilgandi. Davlat tomonidan “Futbol-TV”ga litsenziya berilgach esa bu jarayon real ahamiyat kasb etdi.
Oldindan aytish kerak, kanal faoliyatini boshlab, o'z ishini yo'lga qo'yib olgunicha qiyin davrni boshdan o'tkazadi. Bu haqiqiy ixtisoslashgan telekanaldir. Unda sportning bor-yo'g'i 1 ta tarmog'i bilan efir setkasini to'ldirish kerak. Ko'rinishidan oson ish. Biroq unutmaslik lozim, UzReport rahbariyati translyatsiyalarni o'g'irlab emas, balki huquqiy jihatdan sotib oladi vashundan keyingina namoyish qiladi. Umid qilamanki, “Futbol-TV” ham bu ishni davom ettiradi. O'z vaqtida “Sport-TV” o'zi istagan futbol uchrashuvlarini olib berish orqali, efir setkasida muammoga duch kelmagan. Ishni to'g'ri yo'lga qo'yadigan kanal sifatida esa “Futbol-TV” buni istamaydi. Yaxshi tomoni, ko'ngilni keng qilib, marketing siyosatini davom ettirishi va qonuniy translyatsiyalari bilan nom qozonishi mumkin.
Ayni vaqtda Italiya, Germaniya, Frantsiya kabi chempionatlar xalqaro miqyosda auditoriya to'plashga chanqoq. Shundan kelib chiqilsa, A seriya, Bundesliga va Birinchi divizion o'yinlarini qo'lga kiritish u qadar qiyin bo'lmaydi. Rossiya telekanallari La liga o'yinlarini sotib ola bilmayotgan bir paytda UzReport bemalol Angliya va Ispaniya chempionatlarini namoyish etmoqdami, demak, qolgan 3 tasini ham istasa hal qila oladi.
Evropada dam olish kunlari bir qator qiziqarli o'yinlar bo'lib o'tishi sir emas. “Futbol-TV” ulardan qay biridir e'tibordan chetda qolib ketmasligini ta'minlaydi va asosiy setkaga tushmay qolgan bellashuvlarni to'g'ridan-to'g'ri UzReport’da ko'rsatishda davom etadi. Aytaylik, “El-Klasiko” va Manchester derbisi bir vaqtga to'g'ri kelib qolganida telekanal rahbariyati muxlislarga tanlov imkoniyatini yaratib beradi. Sizga La liga qiziqroq bo'lsa bitta kanalga, Angliya futbolidan boshqasini tan olmasangiz, boshqa kanalga ulanib olishingiz mumkin. So'nggi vaqtlarda Tojikistonda ham futbol kanali faoliyatini boshlayotgani, Qirg'izistonning “KTRK Sport” anchadan buyon futbol uchrashuvlarini ulashayotgani bor gap. Biroq hozirgi holatda “Futbol-TV” borayotgan yo'l ularnikiga nisbatan salmoqliroq ekani bilan ajralib turadi. Parallel boshlanadigan ikki qiziqarli o'yindan qay biridir tushib qolmasligi mayliku-ya, kanalning davlat qaramog'ida emasligining o'ziyoq kishini xursand qiladi. Masalan Tojikistonda ochilayotgan yangi kanal mamlakat futbol federatsiyasiga qarashli, “Futbol-TV” esa hamma ishni bosqichma-bosqich o'zi amalga oshirib keldi.
Mana endi savol tug'iladi, bordi-yu “Futbol-TV” kuchli beshlikning qolgan 3 ta chempionati translyatsiyasini ham qo'lga kiritsa, u holda “Sport-TV” nima qiladi. Javobni 2 yil avvalgi holatdan ham topish mumkin. UzReport’da Angliya Premer-ligasi o'yinlari ko'rsatila boshlangach, “Sport-TV” bunga haqsiz bo'lib qolgandi. Xuddi shundan kelib chiqib, Bundesliganing qadami ham MTRK kanalidan katta ehtimol bilan uziladi.
Shunga qaramay, “Sport-TV” O'zbekiston milliy chempionati, milliy terma jamoa ishtirokidagi o'yinlar, Osiyo Chempionlar ligasi kabi musobaqalarni ko'rsatishda davom etadi. Biroq qachongacha degan savol ochiq turaveradi. “Futbol-TV” o'zi  tanlagan yo'l yordamida kun kelib bu bosqichga ham etib kelishi mumkin. Ammo tushunishim bo'yicha, kanal asosan xorij futboliga katta urg'u beradi.
Buning yaxshi tomoni ham bor. “Sport-TV”da rahbariyat o'zgargan bir paytda davlat amalga oshirayotgan ishlar, sportga bo'lgan e'tibori ancha kam yoritilishi tanqid qilib o'tilgandi. Mana endi “Sport-TV” asosiy e'tiborini shunga qaratishi mumkin. Kuchli beshlik va umuman xorij futbolining boy berilishi “Sport-TV”ni so'nggi oylarda ancha ommalashib qolgan futzal, boks, tennis sport turlariga yanada ko'proq urg'u berishga undaydi. Eng muhimi O'zbekistonda noqonuniy translyatsiyalar soni 1 taga bo'lsa ham kamayadi.
Aslida “Sport-TV”ni tashkil qilishdan asosiy maqsad aholi o'rtasida sog'lom turmush tarzini shakllantirish va yoshlarning sportga bo'lgan muhabbatini oshirishdan iborat edi. “Futbol-TV”ning ish boshlashi bu borada navbatdagi qadamlardan biri bo'ladi.
Ishonamanki, uik-end kunlari futbol muxlislari asosan 1 ta kanalda bo'ladi. O'sha kuni tushdan keyin studiya Evrofutbol soatini boshlab, to yarim kunga qadar muxlislarni ekran qarshisida ushlab turishga harakat qiladi. Davron Fayziev, Yoqubjon Bobojonov va qator shunga o'xshash sharhlovchilar faqatgina kadr ortidan turib emas, studiyadagi chiqishlari, o'z fikrlari bilan ham muxlislar qarshisida namoyon bo'ladi. Futbol muxlislarining so'nggi 3-4 yilda armon bo'lib qolayotgan istaklari reallik kasb etayotgani quvonarli holat. Endi bizning xonadonlarga ham futbol qaytib, seriallar u bilan hisoblashishga majbur bo'ladi.
Diyor IMOMXO'JAEV, «Erudit SPORT» gazetasi
— deya xabar beradi uff.uz nashri.