"Agar har bir kishi o'z joyida, o'z xizmati doirasida qonunga amal qilib yashashni hayot tarziga, mehnatga munosabatning axloq normalariga aylantira olsagina ortiqcha nazoratga hojat qolmaydi". Islom Karimov O'zbekiston Respublikasi Prezidenti Shavkat Mirziyoevning mamlakatimizni 2016 yilda ijtimoiy-iqtisodiy rivojlantirishning asosiy yakunlari va 2017 yilga mo'ljallangan iqtisodiy dasturning eng muhim ustuvor yo'nalishlariga bag'ishlangan Vazirlar Mahkamasining kengaytirilgan majlisida co'nggi besh yilda jismoniy tarbiya va sportni rivojlantirish, shuningdek, uning moddiy-texnik bazasini mustahkamlash uchun byudjetdan 1 trillion 230 milliard so'm ajratilib, bizda bolalar sporti, oliy sport mahorati va olimpiya rezervlarini rivojlantirish bo'yicha qudratli baza yaratilganligini ta'kidlab o'tgandi. Ushbu raqamlarni keltirar ekan, Prezidentimiz Shavkat Mirziyoev barcha rahbarlarga sportni rivojlantirish uchun yana qanday baza, qo'shimcha shart-sharoit va vositalar kerak? Ana shu muammolar ichiga chuqur kirib borish zarur?, degan svolni o'rtaga tashlagan edi. Haqiqatda ham istiqlol yillarda sportni tez sur'atlar bilan rivojlanishida mamlakatimizda keng ko'lamli ishlar amalga oshirildi. Ayniqsa, bolalar sporti, ayollar sporti hamda bugungi kunda aholining eng ko'p qatlamini o'ziga jalb etib, sport bilan oshno tutinishiga sababchi bo'layotgan futbolni rivojlantirish maqsadida o'nlab qaror va farmonlar e'lon qilindi. Afsuski, futbolni rivojlantirish uchun ko'plab qarorlar e'lon qilinishiga qaramasdan ularning ijrosini bajarishda yo'l qo'yilayotgan suskashtlik, rahbarlarning o'z ishiga bo'lgan mas'uliyatsizligi, xuddi tibbiyot sohasidagi bo'lgani kabi, aholi, xususan bolalarni sog'lom turmush tarziga etaklashda bugunning asosiy omili bo'lmish sportdagi muammolar ham bir jihatdan sog'lom turmush tarzini hayotgan tadbiq etishda to'sqinlik qilmoqda. Bugun mamlakatimizda futbolga alohida e'tibor qaratilayotgan bo'lsada, ammo yaratilgan sharoitlardan o'z manfaatlari yo'lida foydalanib, noqonuniy yo'llar orqali mo'may daromad ilinjida turli qabixliklardan ham tolmaydigan ayrim mansabdor shaxslar nafaqat yurtimiz shaniga dog' tushirmoqda, balki bugun targ'ib qilayotgan inson manfaatlarining poymol bo'lishiga bosh omil bo'lmoqda. Xususan, “Dinamo-plyus” PFK va uning tasarrufidagi Bolalar va o'smirlar maxsus futbol sport maktabida so'nggi yillarda yuz berayotgan voqeyliklar, rahbarning o'z xodimlarining haq-huquqlaridan ko'ra o'zining manfaatlarini ustin qo'yishi oqibatida biz bugun targ'ib qilayotgan inson manfaatlarining buzilishiga sabab bo'lmoqda. Har bir sohada bo'lgani kabi futbolda ham rahbarlarning shaxsiy javobgarligini oshirish, aniqroq qilib aytganda tartib-qoida eng muhim hisoblanadi. Biroq, “Dinamo” professional futbol klubi va uning qoshidagi futbol maktabida bo'layotgan voqealar haqida so'z yurtilganda hammasi quruq ishlarga, ko'zbo'ymachilikka aylanib borayotgan bugun ko'pchilikka sir emas. Vazirlar Mahkamasining yil yakuniga bag'ishlangan kengaytirilgan majlisida ma'ruza qilgan Prezidentimiz Shavkat Mirziyoev aksar rahbarlar murakkab muammolarni kabinetdan chiqmasdan, haqiqiy ahvolni chuqur o'rganmasdan hal etishga odatlanib qolganini qayd etib, rahbarlarga xos baland dimog'lik, qog'ozbozlik, sansalorlik kabi qusurlarga alohida e'tibor qaratgan edi. “Faqatgina “g'alaba raportlari” bilan, shuningdek, muammolarga umuman aloqasi yo'q, o'z orzu-istagidagi mavhum narsalarni haqiqat deb ko'rsatadigan shaxslar tomonidan tayyorlangan axborotnomalar bilan cheklanib qolish mumkin emas” deya katta-kichik rahbarlarni ogohlantirgan edi. O'zbekiston Respublikasi Prezidenti Shavkat Mirziyoev ta'kidlab o'tgan yuqoridagi holatlar so'nggi yillarda “Dinamo” futbol klubi va uning qoshidagi futbol maktabida yuz berayotgani, bu so'zlar naqadar haqiqat ekanligini yana bir bor isbotladi. ASOSLARGA ASOSLANMAY ChIQARILGAN QAROR Keling, voqeylikni sal avvalroqdan boshlasak... 2015 yil 12 yanvar kuni №5-sonli xat bilan «Dinamo» PFK birinchi vitse-prezidenti vazifasida ishlagan Firdavs Karimov viloyatning o'sha vaqtdagi hokimi Zoir Mirzaev va O'zbekiston professional futbol ligasi direktori Farhod Magometovga klub haligacha PFL litsenziyasini olmagani, litsenziyalashtirish ishlari o'z vaqtida amalga oshirilmasa OFK tomonidan jarimaga tortilishi, jarima puli valyutada to'lanishi lozimligi va shunga o'xshash boshqa masalalar ko'tarilgan mazmundagi xat yo'llagandi. Mazkur xatga 2015 yil 10 fevraldagi №20-sonli xat bilan javob yo'llagan O'zPFL direktori Farhod Magometov «Dinamo» PFK allaqachon litsenziyalashtirilgani, bu borada klub barcha ishlarni amalga oshirganligi va OFK tomonidan hech qanday jarimaga tortilmasligi, ayniqsa valyutada pul to'lanmasligini isbotlovchi sabablarni ko'rsatib, klub birinchi vitse-prezidentining yozgan xati hech qanday asosga ega emasligini tasdiqlovchi javob xati bergandi.   Garchi O'zPFL to'liq qonuniy asoslarni keltirgan holda klub xatiga javob yozgan bo'lsada «Dinamo»da uzoq yillardan beri huquqshunos bo'lib ishlab yangi mavsum oldidan klub rahbari bo'lgan Shuhrat Hotamov (asli ismi Shavkat), klub sport direktori Rustam Istamov, «Dinamo-plyus» PFKning o'sha vaqtdagi birinchi vitse-prezidenti Firdavs Karimovlar O'zbekiston professional futbol ligasi, o'zidan yuqori turuvchi tashkilot rahbarining javob xatini asossizga chiqarib o'z bilganicha «Dinamo-plyus» PFK Prezidentining 2015 yil 2 martdagi 5-P va aynan shu sanadagi 6-K sonli buyruqlari bilan futbol maktabi direktori Doniyor Yusupovni “Malakasi etarli bo'lmaganligi OFK va PFLning “A” litsenziyasiga ega emasligi uchun” ishdan bo'shatib tashlagandi. Klub qoshidagi futbol maktabi direktorini hech qanday asoslarga ega bo'lmasdan turib ishdan olib tashlanishiga aslida qoniqarsiz natijalar sabab klubdan ketgan, jamoaning ayni paytdagi rahbari bo'lmish Alisher Latipovni uzoqroqdan bo'lsada klub ishlariga aralashtirish maqsadida o'ylab topilgan “o'yin”lardan biri edi. Klub rahbarlarining adolatsiz bu “o'yin”idan jabr ko'rgan direktor ko'p joylarga murojaat qildi. Biroq, so'nggi pallaga kelganda hech kim adolatni tan olishni istamadi. Klub rahbarlari va boshqa huquq himoyachilari O'zbekiston professional futbol ligasi yuborgan xatni inobatga olmadi. Aniqroq qilib aytganda, o'zidan yuqori turuvchi tashkilotning ASOSLI XATini kimningdir manfaati uchun shunchaki ASOSSIZga chiqardi. Prezidentimiz ta'kidlaganidek, sohaga mas'ul bo'lgan rahbar xodimlar muammoni odatdagidek kabitenda o'tirib echishdi xolos. Mana sizga futbolga bo'lgan munosabat. Mana sizga futbolning eng kichik bo'g'inga bo'lgan e'tibor. Xullas, bu voqealar o'tdi-ketdi. Qonunga tayanganlar yig'lab, qonunni buzganlarning ko'chasida bayram bo'lgandio'sha vaqtda. Doniyor Yusupov ishdan olingandan so'ng ko'p o'tmay Alisher Latipov klub tasarrufidagi futbol maktabiga direktor bo'lib keldi. Voqealarning keyingilari shu qadar tezlashib ketdiki, bu orada Alisher Latipov klub rahbari bo'lib qoldi. Shundan so'ng maktabda ham o'zgarish boshlandi. VAQTINChALIK ShOH... Xalqimizda mullani aytganini qil, qilganini qilma, degan naql bor. “Dinamo” PFK rahbariyati avvalgi direktorni “Malakasi etarli bo'lmaganligi OFK va PFLning “A” litsenziyasiga ega emasligi uchun” ishdan bo'shatib yuborgandi. Biroq, shundan so'ng “Dinamo-plyus” PFK tasarrufidagi Bolalar va o'smirlar maxsus futbol sport maktabiga asli mutaxassisligi sharq yakkakurashlari turiga ixtisoslashgan Jahongir Eshonqulovni vaqtinchalik  direktor etib tayinladi. O'zbekiston Respublikasining amaldagi qonunida, aniqroq qilib aytadigan bo'lsak, Vazirlar Mahkamasining 2010 yil  23 sentyabrdagi “Sport maktablari faoliyatini xamda sport maktablari trenerlari va mutaxasislari mehnatini moddiy rag'batlantirish tizimini yanada takomillashtirish to'g'risida”gi 211-sonli qarorining 1-ilovasidagi “O'zbekiston Respublikasidagi Davlat byudjetidan moliyalashtiriladigan sport maktablari to'g'risida”gi Nizomning VIII-bob, 57-bandi, 2-kichik bandida, sport maktabi direktori oliy ma'lumotli hamda jismoniy tarbiya va sport tashkilotlarida kamida besh yilstajga ega bo'lgan sportning maktabda rivojlantiriladigan turi bo'yicha mutaxasislardan tayinlanishi aniq qilib belgilab qo'yilgan. Savol tug'iladi, amaldagi qonunni ko'r-ko'rona buzgan klub rahbariyati yangi direktorni tayinlashda nega yuqoridagi qonunga amal qilishni istamadi? Nega malakasi etarli bo'lmagan, boz ustiga OFK va PFLning “A” litsenziyasiga ega bo'lmagan, eng yomoni mutaxassisligi sharq yakkakurash turiga ixtisoslashgan xodimni qo'ydi? Axir yurtimizda qonun hamma uchun barobar emasmi? Yoki o'z manfaatlaridan kelib chiqib qonun istagancha talqin qilinadimi? Xo'sh, klubning bu qonunbuzarligini kim yoki qaysi yuridik tashkilot izohlab bera oladi. Bu kabi savollarga qaysi mas'ul tashkilot javob beradi? Madaniyat va sport ishlari vazirligimi yoki Xalq ta'limi vazirligimi? Umuman olganda futbol maktablarining faoliyati qachon nazoratga olinadi? Qachongacha “salla desa kallani olamiz”? Balki Jahongir Eshonqulov rasman direktor emas, direktor vazifasini bajaruvchi sifatida ishlab kelmoqda shuning uchun yuqoridagi qonun istisno qilinadi deydiganlar ham topilar. Balki rostdan ham “vaqtinchalik direktor” uchun ayrim qonunlar istisno qilingandir? Ammo uning buyrug'i, uning imzosi asosida qilinayotgan ishlarchi? Bu ishlar orqali jabr ko'rayotgan maktab murabbiylarining qonuniy huquqlarining poymol bo'lishichi? Barachamiz uchun sevimli bo'lib qolgan “Ivan Vaselevich o'z kasbini o'zgartiradi” degan kinoda tarixiy shaxsni o'rniga imzo qo'yishni istamgan “vaqtinchalik shoh” muhim bir hujjatda “vaqtinchalik shoh vazifasini bajaruvchi...” deb imzo qo'yadi. Esladingiz-a? Aynan shu imzo film so'nggida mulozimlar tomonidan aniqlanib, shohning sohta ekanligi oshkor bo'ladi. Bu ham mayli, butun bir saroyda to'polon bo'lganichi? Jahongir Eshonqulov “vaqtinchalik shoh” bo'lishga shu qadar kirishib ketdiki, u o'ziga xon ko'lankasi maydon bo'lib qoldi. Buni qarangki, “vaqtinchalik shoh”ga hamrohlik qilish uchun tezda “Miroslavskiy” ham topilib qoldi. QAYNAR XUMChA... 2016 yilning noyabr oyida Qarshi shahrida 2000 yilda tug'ilgan bolalar o'rtasida o'tkazilgan tayyorlov guruhi (gruppa podgotovka) musobaqasiga borish Nodir Mardonov va uning yordamchisi Abror Ismatovlarning chekiga tushdi.  Qiziq jihati shundaki, tayyorlov guruhi musobaqasiga “Dinamo-plyus” PFK tasarrufidagi Bolalar va o'smirlar maxsus futbol sport maktabida tarbiyalanayotgan futbolchilarning atiga uch-to'rttasini olgan xolos. Xo'sh, jamoa murabbiyi tarkibdagi qolgan futbolchilarni qaysi futbol maktabidan olgan? Boshqa futbol maktabida tayyorlanayotgan bolalar olingan bo'lsa, bu tayyorlov guruhi musobaqasining nizomini ochiqdan-ochiq buzilishiga sabab bo'lmaydimi? Yoki musobaqaga qaysi futbol maktabi tarbiyalanuvchisi borishidan ko'ra, undagi ishtirok muhimmi? Qolgan jihati, aniqroq qilib aytganda boshqa qonuniy talablar ahamiyatsizmi? Ajablanarli jihati shundaki, asosiy tarkibini boshqa futbol maktabida shug'ullanayotgan bolalar bilan to'ldirilgan Nodir Mardonov jamoasiga “Dinamo-plyus” PFK tasarrufidagi Bolalar va o'smirlar maxsus futbol sport maktabi hisobidan xizmat safari (komandirovka) ajratib berilgan. Xo'sh aytingchi, maktab murabbiylarining qo'l ostidagi tarbiyalanuvchi bolalari o'rniga boshqa futbol maktabining bolalari borishiyu, ikkinchi maktabning hisob raqamidan xizmat safari uchun pul chiqarilib berilishi qaysi qonunchilikka to'g'ri keladi? Yoki bu erda boshqa bir maqsad bormi? Xo'sh, bunday qing'irliklarni nazoratga oladigan tashkilot yo'qmi? Axir maktab murabbiylari yillar davomida o'zbek futboliga nafi tegadigan, hech bo'lmaganda sog'lom voyaga etadi deya katta bir umidlar bilan bola tarbiyalasayu, musobaqalarga boshqa futbol maktabi bolalarini yuborilishi qaysi nizomga to'g'ri keladi? O'tgan yilning noyabr oyida Navoiy shahrida professional futbol klublari qoshidagi futbol maktablarning 2004 yilda tug'ilgan bolalar o'rtasida musobaqa o'tkazildi. Mazkur musobaqada ishtirok etgan Zarif Sherov shogirdlari uchinchi o'rin uchun Buxoro jamoasiga qarshi maydonga tushishi kerak edi. Biroq, noma'lum sabalarga ko'ra ikkala jamoa uchinchi o'rin uchun o'tkazilishi lozim bo'lgan o'yida maydonga tushmadi. Yakunda esa har ikkala jamoaga uchinchi o'rinni oldi degan diplom berildi. Musobaqa nizomida shunday keltirilgan bo'lsa bu erda hech qanday qonunbuzarlik yo'qku degan savol tug'ilishi mumkin. Biroq masalaning ikkinchi tomoni borki, bu hol o'tkazilmagan o'yin uchun xujjatlar rasmiylashtirilib, viloyat madaniyat va sport boshqarmasining tasdig'idan o'tkazilib, moliyaga taqdim etgan holda bir yil davomida davlat pulini o'zlashtirish. Oddiygina, bir yil davomida beshta o'tkazilgan (yoki o'tkazilmagan) musobaqaga xuddi shunday xujjat qilib qanchadan qancha mablag'ni ko'kka sovurish mumkin? Futbol maktablarining musobaqaga borish-kelishi, mehmonxona, ovqatlanish va boshqa xarajatlar uchun ajratilgan pulni hisob-kitob qilish, aniqroq qilib aytganda uni nazorat qilish kimning vazifasi? Vaholangki, "O'zbekiston Respublikasi Davlat byudjetidan moliyalashtiriladigansport maktablari to'g'risidag"gi Nizomning 84-moddasida "Sport maktabining moliya-xo'jalik faoliyatini va moliya intizomiga rioya etilishini nazorat qilish qonun xujjatlariga muvofiq vakolatli davlat organlari tomonidan amalga oshiriladi" deb belgilab qo'yilgan. Xo'sh, davlat mulki talon-taroj qilingani uchun bugun kim javob berishi kerak? Qaysi vakolatli tashkilot futbol maktabidagi moliya intizomini nazoratga oladi? Prezidentimiz Shavkat Mirziyoev bugun har bir yig'ilishida rahbarlarning mas'uliyatligi, ularning fuqarolarning murojaatlarini o'z vaqtida o'rganish lozimligi xususida aytib o'tadi. Biroq futbol maktabi direktori maktab kasaba uyushmasi rahbari bo'lib ishlagan G'ofir Amonovni yig'ilishda murabbiylarning tarafini olgani uchun, aniqrog'i maktab jamoasining yig'ilishida derektorga yon bosmaganligi uchun maktab kasaba uyushmalari qo'mitasi vazifasidan bo'shatib tashladi. Bu ham etmaganidek, o'zidan salkam o'ttiz yosh kattta, yoshi oltmishga yaqinlashgan G'ofir Amonovni butun boshli jamoadoshlari oldida haqorat qilganini qanday tushunish mumkin? Zo'ravonlikmi yoki manmanlik?  Nohaq haqortlangan G'ofir Amonov bu masala yuzasidan maktab kasaba uyushmalari qo'mitasiga(profsoyuzga) ariza bilan murojaat qilgan. Biroq, oradan shuncha vaqt o'tsada bu holatga hech qanday qonuniy javob qaytarilmagan. Shu holatning o'zi fuqarolarning, ishchi xodimlarning murojaatlariga bo'lgan e'tiborsizlik emasmi? Qani bu erda qonun ustivorligi? Qani biz istayotgan adolat? DAVOMI BOR... Farhod NORBO'TAEV
— deya xabar beradi uff.uz nashri.