O'zbekiston milliy terma jamoasi va BAAning "Ash Shabob" klubi yarim himoyachisi Aziz Haydarov JCh-2018 va OK-2019 saralashida Bahreynga qarshi kechadigan o'yin haqida fikrlarini bildirib o'tdi.
"Hozir biz shunday sharoitdamizki, oldimizda g'alaba qozonishdan boshqa yo'l yo'q. Umuman, boshqacha bo'lishi ham mumkin emas. Terma jamoa libosini kiydingmi, shu yurt bayrog'i ostida maydonga  tushyapsanmi, faqat g'alaba uchun o'ynashing shart. Albatta inson turli holatda bo'ladi va ba'zan muammolar tufayli klubda har doim ham eng yaxshi o'yiningni namoyish eta olmaysan. Ammo terma jamoada har qanday muammolar chetga surilishi shart. Bu erga keldingmi, qolgan barcha o'y-hayol muammolarni eshikdan nariga tashlab kelishing kerak. Bu erda faqat g'alaba haqida o'ylash lozim.
Bahreyndagi o'yin oson kechmasligi aniq. Bu raqibni yaxshi bilamiz, boz ustiga u erda iqlim ham issiq, namgarchilik yuqori. Bunday sharoitda qanday o'ynash kerak? Men anchadan buyon BAAda o'ynayman. Bunday sharoitda kuchni tejay olish kerak. Futbol 90 daqiqa o'ynaladi va kuchni shunga qarab sarflash lozim. Buning uchun esa to'pni ushlay olish kerak. Tashabbus senda bo'lganida, o'yinni ham nazorat qila olasan. Futbolda to'psiz o'ynagan jamoa tezroq charchaydi", - deydi Aziz Haydarov.
Eslatib o'tamiz, O'zbekiston MTJ 8 oktyabrda safarda Bahreynga qarshi maydonga tushadi.
— deya xabar beradi uff.uz nashri.