O'zbekiston milliy terma jamoasi sobiq bosh murabbiyi Vadim Abramov "Buxoro"da maslahatchi murabbiy sifatida ish olib borayotganini keskin rad etdi. Murabbiyning aytishicha, unga shunday taklif bo'lgan, ammo rad etgan.
"Buxoro"da ish olib borayotganim haqidagi xabarlar hech qanday asosga ega emas. Men ayni vaqtda hech bir klubda ishlamayapman va “Buxoro”ga ham hech qanday aloqam yo'q. Hozir klub bosh murabbiyi sifatida Ulug'bek Baqoev ish boshlagan. Unga Baxtiyor Ashurmatov yordam bermoqda. Mening esa klubga hech qanday aloqam yo'q.
Oxirgi vaqtlarda ko'p qo'ng'iroqlar bo'lmoqda va “Buxoro”da ish boshlaganim bilan tabriklashyapti. Ammo tushuning, men hech qaerda ishlamayapman. To'g'ri, "Buxoro"ga taklif etishgan edi, ammo taklif kutilmaganda bo'ldi. Bu yoqda mavsum boshlanishiga ham oz fursat qolgandi. O'sha vaqtda tashvishlarim etarlicha edi, yaqin qarindoshlarimdan biri Moskvada davolanayotgandi va uning oldiga borishim kerak edi. Shunchaki, taklifni shu erda turib rad etish noqulay bo'ldi. Buxoroga borib, shaxsan ko'rishib, vaziyatni tushuntirib qaytdim", - deydi Vadim Abramov.
— deya xabar beradi uff.uz nashri.