Server Jeparovning peshonasiga «Istiqlol»da darhol o'ynab ketish yozilmagan ekan. FIFA transferlar borasida taqiq qo'ygani sababli Jeparovning shartnomasi tasdiqlanmadi. Hammasiga aybdor - «Istiqlol»ning o'zi. Klub germaniyalik legioner Adil Chixining maoshini to'lamagani bois yangi futbolchilarni rasmiylashtirish huquqidan mahrum qilindi. Ammo bizni «Istiqlol»ning taqdiri u qadar tashvishga solmaydi. Muhimi - Server Jeparov o'yin amaliyotisiz qolmadi. U yozgacha «Fulad» tarkibida ijara asosida o'ynab turadi. Server Jeparov O'zbekiston milliy terma jamoasi uchun qay darajada ahamiyat kasb etishini hamma yaxshi biladi. 15 yildan buyon termada muntazam o'ynab kelayotgani ham buning yaqqol isboti bo'la oladi. Hali hech bir futbolchi u kabi uzoq muddat terma jamoa sharafini himoya qilmagan edi. Jeparov O'zbekiston terma jamoasi safida eng ko'p o'yin o'tkazgan futbolchi bo'lib turibdi - 121ta uchrashuv. U nafaqat pleymeyker, balki ikkinchi hujumchi sifatida ham bemalol to'p sura oladi. Ko'p gol urishining boisi ham shunda. Masalan, 2008 yil oliy ligada 19ta gol bilan eng yaxshi to'purar bo'lgan edi. O'zbekiston terma jamoasida esa shu vaqtga qadar 25ta golga mualliflik qilgan. Shunday ekan, agar Jeparov o'yin amaliyotisiz qolib ketsa, ko'p narsa yo'qotgan bo'lar edik. Bu holat O'zbekiston terma jamoasida tizimli muammolarga olib kelishi hech gap emasdi. Chunki tarkibda uning o'rnini bosa oladigan futbolchi yo'q. Garchi Jeparovning faoliyati borgan sari yakunlanib borayotgan bo'lsa-da, o'tgan vaqt davomida u kabi o'ynaydigan yarim himoyachi topilmadi. Shu bois ham 35 yoshga to'lgan futbolchi hamon asosiy tarkibda. Endi bir savol, shu to'g'rimi? Ta'kidlash lozim, Samvel Babayan terma jamoa boshqaruviga kelgandan so'ng Jeparovga bog'liqlikni yo'qotish uchun ko'p ishlarni amalga oshirdi. Eng avvalo, undan sardorlik bog'ichi olib qo'yildi. So'ng-ra asta-sekin o'rnida boshqa futbolchilar sinovdan o'tkazildi. Ammo na Jamshid Iskanderov va na bosh-qa nomzod bu ishni uddalay oldi. Shunga qaramasdan, Jeparovga bog'liqlik ancha-muncha kamaygandek. Biroq bu ish boshqa futbolchiga bog'lanish orqali amalga oshirildi. Hozir terma jamoa o'yini to'lig'icha Odil Ahmedovga bog'liq va buni Samvel Babayanning o'zi ham bir necha bor tan olgan. Odil yaxshi o'ynasa, butun jamoa yaxshi o'ynaydi. Mabodo u bo'lmasa, o'yin ham yo'q. Shubha qilganlar bo'lsa, Eronga qarshi Toshkentda kechgan uchrashuvni eslashsin (0:1). Davomi: www.interfutbol.uz InterFutbol.uz ning Telegram dagi sahifasiga ulaning – eng so'nggi yangiliklar, qiziqarli bloglar va tahliliy materiallar endi bir to'plamda.
— deya xabar beradi uff.uz nashri.