AYoL BAXTLI BO'LSA... Bugun mamlakatimizda inson huquq va erkinliklarini, qonuniy manfaatlarini ta'minlashga alohida e'tibor qaratilayotgani natijasida oilaga, ayol zotiga bo'lgan munosabatimiz o'zgarib, ularga hurmat-ehtirom ko'rsatish hayotimizning ma'no-mazmuniga, asosiy maqsadiga aylandi. Istiqlol davrida biz ko'p narsalarni xuddiki qaytadan kashf etgandek bo'lmoqdamiz. Ayol go'zal bo'lsa — olam go'zal, ayol baxtli bo'lsa — oila, butun jamiyat baxtli bo'ladi, degan qarash ongu shuurimizga chuqur kirib borayotgani va bizning hayotiy falsafamizga aylanayotganini har tomonlama anglab etayapmiz, degandi O'zbekiston Respublikasining Birinchi Prezidenti Islom Karimov. Xalqimizda, kimnidir sinab ko'rmoqchi bo'lsang unga mansab, amal berib ko'r, shundagina uning kim ekanligi namoyon bo'ladi degan gap bor. Mansab – vazifa, u rahbarga mas'uliyat yuklaydi. Biroq, mas'uliyat degan hohlaganini qiladi degani emas. “Vaqtinchalik direktor” o'z mansab doirasini jilovlay olmaganligi, aniqrog'i rahbarlikka o'tirganidan so'ng bosar-tusarini bilmay qolganini qo'l ostida ishlaydigan kotiba Maftuna Olimovani haqoratlaganiyu, uning dugonasi Gulmira Shodmonovani urganini shunchaki so'z bilan ta'riflab bo'lmaydi. Shumi, bugun biz ko'klarga ko'tarishimiz lozim bo'lgan ayolga munosabat, degan achchiq savol vijdoni bor insonni qiynashi tabiiy. O'z jilovini bilmagan direktor kotiba va uning dugonasini urgani uchun Jinoyat ishlari bo'yicha Pastdarg'om tuman sudida ma'muriy javobgarlik ishi ko'rilgan. Ammo yarashtiruv asosida ish “hal qilgan”. Ayol kishiga qo'l ko'tarib, ma'muriy yarashtirish sharti bilan qilmishini yopib ketgan direktor ertaga yana shu ishni takrorlamasligiga kim kafolat bera oladi. Axir, “o'rgangan ko'ngil o'rgansa qo'ymas”, degan naql bejizga aytilmaganku? Bugun mamlakatimizda keng miqiyosida islohotlar amalga oshirilib, kam ta'minlangan oilalarga birinchilardan bo'lib yordam berish, ularni ish bilan ta'minlash orqali turmush tarzini yaxshilashga katta e'tibor qaratilgan. Bugun qaysi bir rahbarning oddiy aholi bilan uchrashuvini kuzatmaylik kam ta'minlagan, ijtimoiy ko'makka muxtoj oila vakillariga yordam berish masalasi o'rtaga tashlaydi. Qolaversa, yurtimizda “Kam ta'minlangan oilalarni ijtimoiy muxofaza qilish”, “Kam ta'minlangan oilalarga ijtimoiy nafaqalar va moddiy yordamlar tayinlash va to'lash” kabi qator qonularimizning borligi ham Davlatimiz ijtimoiy ko'makka muhtoj odamlarni o'z muxofazasiga olganligini yana bir bor isbotlaydi. Afsuski, hukumatimiz tomonidan kam ta'minlangan oilalarga katta e'tibor qaratilayotgan bir vaqtda “Dinamo-plyus” PFK tasarrufidagi Bolalar va o'smirlar maxsus futbol sport maktabi direktori Jahongir Eshonqulovga maktabda oddiygina farrosh bo'lib ishlaydigan, boquvchisini yo'qotib akasining qaramog'ida qolgan Ozoda Yo'ldoshevaning farroshlik qilishi “ma'qul” kelmadi. Natijada qishni qish, yozni yoz demasdan maktab xonalarni tozalab, achinarlisi shu ishi uchun arzimas maosh oladigan Ozodaga shu ish ham ko'p ko'rildi. Mana sizga kam ta'minlangan insonga yordam berish? Ana sizga ayolga bo'lgan mehr-oqibat?             Sportda, ayniqsa futbolda jarohat olish bu katta azob. Ba'zan shunday jarohatlar bo'ladiki inson bir umr to'shakka mixlanib qolishi mumkin. Bunga yuzlab sportchilarni misol qilishimiz mumkin. Shu bois ham mamlakatimizda har bir sport maktabida tibbiyot xodimlariga alohida o'rin ajratilgan. Bu esa o'z navbatida sportchining salomatligini nazorat qilib borish, musobaqalarda olingan jarohatlarda dastlabki tez tibbiy yordamni ko'rsatish imkonini beradi. Qolaversa, “O'zbekiston Respublikasidagi O'zbekiston Respublikasi Davlat byudjetidan moliyalashtiriladigan sport maktablari to'g'risida”gi nizomning 72-bandida Sport maktabining tibbiyot xodimlari belgilangan tartibda o'quv-mashq jarayonini, sport musobaqalari va sport-sog'lomlashtirish oromgohini tibbiy ta'minlaydi, mashq yuklamalarining hajmi va muntazam o'tkazilishini nazorat qiladi, o'quvchi-sportchilarni tayyorlashning yakka tartibdagi rejalarini tuzish va tasdiqlashda qatnashadi, chuqurlashtirilgan tibbiy tekshirish o'tkazilishini tashkil etishi belgilab qo'yilgan. Afsuski, futbol maktabida direktorning e'tiborsizligi, mas'uliyatsizligi evaziga so'nggi marta qachon dori olinganligini hech kim eslay olmaydi. Aniqroq qilib aytganda, so'nggi bir yil davomida futbol maktabida atigi bir marotaba dori olingan, xolos. Mana sizga qo'l ostida tarbiya topayotgan bolaning sog'ligiga tashkilot rahbarining munosabati. Axir maktabning yillik xarajatlar smetasiga aynan bolalarni turli xil jarohatlardan saqlash, ularni mashg'ulot va musobaqalarda jarohat olsa birinchi tez-tibbiy yordam ko'rsatish uchun zarur bo'lgan dori vositalarini olish kiritilmaganmi? Bordiyu kiritilgan bo'lsa, unda ajratilgan pullar qaerga ketgan? Nega so'nggi bir yildan oshiq vaqt davomida futbol maktabi direktoriga tibbiyot xodimlari dori olishni aytsada, direktor dori olishni hayoliga ham keltirmagan?   Qolaversa, futbol maktabida shifokor bo'lib ishlaydigan Raxmon Mavlonovning oylik maoshlari bir necha-bor oshirilishiga qaramasdan unga beriladigan mablag' miqdori eski holicha bo'lib kelavergan. Shuningdek, O'zbekiston Respublikasi Prezidenti Shavkat Mirziyoevning tibbiyot xodimlarining oylik maoshlarini 15 foizga oshirish to'g'risidagi qaroriga muvofiq shifokorning maoshi ko'tarilishi lozim edi. Biroq, futbol maktabi direktori bugalter Jasur Omonov mazkur qaror asosida Raxmon Mavlonovga oylik qo'shib bergan bo'lsada, amalda esa qo'shilgan summani bermaganiga nima deysiz? Shuning o'zi birovning haqqini eyish emasmi? Shu emasmi o'z nafsining jilovini bilmaslik? DAVOMI BOR... FARHOD NORBO'TAEV
— deya xabar beradi uff.uz nashri.