Hozirgi kunda futbol xitoylik milliarderlar uchun asosiy maqsadga aylangan. Birgina o'tgan yilning o'zida ular dunyoning deyarli barcha eng zo'r futbolchilariga aql bovar qilmaydigan darajadagi maoshlarni taklif qilishdi. Masalan, Xalk «Shanxay Telleys»ga o'tib ketdi, uning «Zenit»dagi sobiq jamoadoshi Vitsel esa «Yuventus»dek obro'li jamoaga rad javobini berib «Tyantszin Tsyuantszyan»ni tanladi. Argentinalik mashhur Karlos Teves dunyodagi eng ko'p maosh oluvchi futbolchiga aylandi. «Shanxay Shenxua» unga yiliga salkam 40 million evro haq berayapti. «Chelsi» hujumchisi Diego Kosta esa 30 million evrolik taklifni eshitib o'zini yo'qotib qo'ydi. Xatto u bosh murabbiy Antonio Konte bilan tortishib qolishga ulgurdi. Kostaning sobiq klubdoshi Oskar endi Xalk bilan bitta jamoada to'p surayapti. «Aristokrat»lar asosiy tarkibga kira olmagan braziliyalikni 52 million funtga pullashdi. Xitoyga shuningdek, Odil Axmedov bilan «Krasnodar»da o'ynagan Fyodor Smolovni ham chaqirishgandi, biroq hujumchi mo'may taklifga rozi bo'lmagandi. Bundan tashqari, xitoylik boyvachchalar birgina futbolchilarning xaridida to'xtab qolishmadi. Osiyolik ishbilarmonlar endi  klublarni ham sotib olishyapti. Shunaqa gaplar. Italiya Milanda endi futbol to'laligicha Xitoyga tegishli, desak ham bo'laveradi. O'tgan yozda chakana savdo bilan shug'ullanadigan Suning Holdings Group kompaniyasi «Inter»ning 68,5 foiz aktsiyalarini sotib oldi (shu jumladan, Massimo Morattining hamma ulushini ham). Xitoy giganti «Inter»ni yanada kuchaytirib va yanada «internatsional» qilmoqchi ekanini e'lon qildi. Yangi xo'jayinlar 150 million evroga yangi futbolchilarni olib kelishdi, lekin bu yurish o'z samarasini bermadi. Natijada, mavsum startini muvaffaqiyatsiz boshlab bosh murabbiy De Burni ishdan ozod etishdi. Hozirgi kunda esa «Inter» g'alabalar seriyasini boshidan o'tkazayapti va Chempionlar Ligasi zonasiga ancha yaqinlashib olgan. Milan shahrining boshqa bir grandi - «Milan»ning ham sotilgani haqida ma'lumotlar tarqalgandi. Kelishuv bo'yicha klub aktsiyalarining 99 foizi Xitoyning Sino Europe Sports Group kompaniyasi ixtiyoriga o'tishi ko'zda tutilgandi. Ammo o'shandan beri kelishuv kuni ikki marta qoldirildi. Boshqa bir ma'lumotga qaraganda, xaridorlar italiyaliklarga qalbaki hujjatlarni taqdim etishgan ekan. Shuning uchun, bu haqdagi aniq ma'lumotlar 2017 yilning 3 martida e'lon qilinadi. Angliya APL vakili «Vest Bromvich Albion» ham endi xitoyliklarga tegishli. U o'tgan yilning sentyabr oyida Guochan Lai (salkam 2,8 milliard dollar sohibi) boshchiligidagi investorlar guruhi tomonidan sotib olingandi. APLdagi ikkinchi «Xitoy jamoasi»ga «Sautgempton» ham aylanishi mumkin. Uning nazorat aktsiyalari paketini Xitoyda stadionlar qurilishi bilan shug'ullanuvchi Lander Sports Development kompaniyasi sotib olishni istayapti. Eng so'nggi ma'lumotlarga ko'ra, klub xo'jayinlari 180 million funtlik taklifni rad etib, 270 million so'ramoqdalar. Bundan tashqari, chempionshipning birdaniga uch ishtirokchisiga ham xitoylikliklar egalik qilishayapti. O'z vaqtida Garvard va Oksfordda o'qigan Toni Sya 76 million funt evaziga «Aston Villa»ni o'ziniki qilib olgan. «Villa»ga kelgach, Sya o'z intervyusida «Manchester Siti» shayxlarining top-transferlarga pul yo'naltirish taktikasini nosog'lom rivojlanish modeli deya qattiq qoralagandi. Yozda «Aston Villa» transferlarga 60 million evro sarfladi, ammo shunga qaramay chempionatda atigi 13-o'rinda borayapti. Darvoqea, Syani universitetdagi natijalarga doir hujjatlarni qalbakilashtirishda, uning kompaniyasi Recon Groupni esa qalloblikda ayblashgan. O'tgan yozda Fosun International investitsiya kompaniyasi 45 million funt evaziga «Vulverxempton»ni xarid qilgandi. Unga ko'ra, xitoyliklar yaqin ikki yil ichida klubga 30 million funt sarflashlari kerak. Bu xaridga ham ba'zi bir savollar bo'lgan. Fosun Jorje Mendeshga tegishli Gestifute kompaniyasining 20 foiziga egalik qiladi. Shu yozning o'zida Mendeshning mijozi Ivan Kavaleyru 7 million funtga «Monako»dan «Vulverxempton»ga o'tdi va bu bilan u ingliz jamoasi tarixidagi eng qimmatbaho futbolchiga aylandi. Hammasi bo'lib esa «Bo'ri»lar safiga 14 nafar futbolchi kelib qo'shilgan. Kuzda Xitoyning Trillion Trophi Asia kompaniyasi «Birmingem» aktsiyalarining nazorat paketini sotib oldi. Klubning sobiq xo'jayini - gonkonglik biznesmen Karson En pullarni o'zlashtirgani uchun hozir qamoqda o'tiribdi. Xitoyning yana bir kompaniyasi China Media Capital Holdingsga «Manchester Siti»ni (shuningdek, MLS ishtirokchisi «Nyu-York»ni) boshqarayotgan Citi Football Group kompaniyasining 13 foiz aktsiyasi tegishlidir. Ispaniya Wanda Group kompaniyasi o'tgan qishda «Atletiko»ning 20 foiz aktsiyasini sotib olgandi. Uning egasi Van Tszyanlin - Xitoydagi eng badavlat (33 milliard dollar puli bor) kishi sanaladi. Kelishuv 45 million evroni tashkil etgandi (Agar madridliklarning katta qarzlari bo'lmaganida bundan ham ko'p bo'lishi mumkin edi). Tszyanlinning rejalaridan jahondagi eng zo'r o'yinchilarga pul sarflash o'rin olmagan. Bu erda uni avvalambor yangi aloqalar va «Atletiko» akademiyasiga xitoylik futbolchilarni olib kelish imkoniyati qiziqtirayapti. Umuman olib qaraganda, Tszyanlinning sportga doir rejalari ulkan: u 1,2 milliard evaziga eng yirik marketing agentlik Infront Sports - Mediani xarid qildi. Infrontning o'zidan 25ta sport turiga aloqador 180 media huquq va yuzlab xomiylik shartnomalarini sotib oldi. Yana u Ironman brendi ostida triatlon musobaqalarini tashkil etib kelgan ushbu kompaniya uchun 650 million berdi. Van Tszyanlin yangi turnirlarni tashkil etishni rejalashtirayapti (ish yangi Chempionlar Ligasigacha ham borib taqalayapti) va uning so'zlariga qaraganda, u Xitoyda sport industriyasi rivoji uchun katta imkoniyatlarni ko'rayapti. «Bizni faqat pul qiziqtiradi» - dedi milliarder. Xullas, Tszyanlin sportni o'zgartirayapti. Taxminan o'sha vaqtda o'yinchoq mashinalarni ishlab chiqaruvchi Rastar Group kompaniyasi  «Espanol» aktsiyalari nazorat paketini sotib oldi. Yangi xo'jayinlar «Espanol»ni Chempionlar Ligasiga olib chiqishga va qarzga botib qolgan jamoaga pul topishni o'rgatishga va'da berishdi. Qolgan dunyo Davomi: www.interfutbol.uz InterFutbol.uz ning Telegram dagi sahifasiga ulaning – eng so'nggi yangiliklar, qiziqarli bloglar va tahliliy materiallar endi bir to'plamda.
— deya xabar beradi uff.uz nashri.