Ko'pchilikning fikricha, Yurgen Klopp 2015 yilda Liverpulga kelganidan buyon jamoa o'yinini o'zgartirdi, lekin keling statistikaga qarab baho beraylik. Yurgen Klopp “Liverpul”ga bosh murabbiy etib tayinlanganiga mana 16 oy to'libdi. Shu davr davomida uning boshchiligidagi jamoa 86 o'yinda maydonga tushdi va yuqori tezlikka asoslangan hujumkor o'yini bilan ko'pchilikning nazariga tushdi. Bu davr mobaynida vaqti-vaqti bilan “Liverpul” ajoyib o'yinlarni namoyish etgan bo'lsada, o'tgan yanvar oyida kuzatilgan past natijalar ishqibozlar va mutaxassislarda jamoada ijobiy o'zgarishlar bo'lyaptimi degan tabiiy savol tug'dirdi. “Liverpul” Klopp kelishidan oldin 2014-2015 mavsumni 62 ochko bilan 6 o'rinda yakunlagandi. Klopp ishlagan yarim mavsumda jamoa 60 ochko va 8 o'rin bilan cheklandi. Bu mavsum, Yurgenning to'laqonli mavsumida “Liverpul” 5-o'rinda bormoqda va agarda jamoa hozirgi o'rtacha yig'ilayotgan ochkolarini yig'ishni davom etsa mayning oxirida jami 74-75 ochko olishi kutilmoqda. Bu natija albatta nemis murabbiyi qo'li ostida jamoaning o'sayotganini bildiradi, ammo Angliya premer ligasidagi kuchli raqobatni inobatga olib aytish mumkinki, yuqorida zikr etilgan ochkolar sovrindorlar qatoridan o'rin olishni bildirmaydi. Shu paytgacha premer ligada Evropa chempionlar ligasiga oxirgi yo'llanma beruvchi 4 o'rinni egallash uchun 66 ochko kifoya bo'lgan hollar kuzatilgan bo'lsa ham (o'tgan mavsum, “Manchester siti”), bu yilgi mavsumda 4-o'rin uchun kurash oxirgi turlargacha qizg'in bo'lishi aniq. Qaysidir jamoa hatto 74 ochko yig'ib ham 4 o'rinni egallay olmasligi mumkin. Turnir jadvalining yuqori o'nligiga qarshi “Liverpul”ning statistikasi ajoyib, oxirgi ikki mavsumdagi statistikaga e'tibor qaratadigan bo'lsak (2014/15: 8 g'alaba – 2 durang – 8 mag'lubiyat, 2015/16: 6 g'alaba – 6 durang – 6 mag'lubiyat) o'zgarishlar ijobiy ko'rinishda. Ayni damda yuqori o'ntalikka qarshi o'tkazilgan 12 ta uchrashuvning 7 tasi g'alaba va 5 tasi durang bilan yakunlangan. Mavsumning qolgan qismida bu natija yana o'sishi mumkin. Turnir jadvalida kuchli 10likka qarshi uchrashuvlar statistikasi: Darvozaga tahdid solish, imkoniyatlardan foydalanish, gol urish borasida ham o'sish kuzatilmoqda. Premer liga klublari o'rtasida to'pga egalik qilish borasida “Liverpul” yuqori pog'onalarni egallab turibdi. Jamoa o'rtacha bir o'yinda 2014/15 yilgi mavsumda 55.8%, 2015/16 yilgi mavsumda 57.2% ko'rsatkichlarni qayd etgan bo'lsa, bu yilgi mavsumda bu ko'rsatkich 62.1% gacha oshgan. Bu borada Yurgen Klopp shogirdlari Chelsi, Arsenal, Manchester Yunayted va Tottenxemlardan yuqoriroqda turishibdi. To'pga ko'proq egalik qilib, o'yin nazoratini ushlab turish murabbiyning taktikasida muhim rollardan birini egallashiga shubha yo'q. Statistik ma'lumotlarga ko'ra, Premer liganing 2002/03 yilgi mavsumidan boshlab o'z maydonida eng ko'p ochko jamg'argan jamoa mavsum oxiriga kelib chempionlikni nishonlayapti. O'z maydonida maksimal ochko yig'ish muvaffaqiyat kaliti bo'lib, Klopp rahbarligida “Liverpul” o'z maydonida oldingi yillarga nisbatan ko'proq ochko yig'a olyapti. O'tgan mavsumlarda bu boradagi ko'rsatkichlar pand bergan bo'lsa, 2016/17 yilgi mavsumda “Suonsi”ga yutqazilgan o'yindan boshqa o'yinlarda “Liverpul” ochkolar ishlab olishga muvaffaq bo'lgan. Umuman olganda, keling, hatto yanvar oyidagi muvaffaqiyatsizliklar ham hisobga olinsa premer ligada Yurgen Klopp qo'li ostida “Liverpul” muvaffaqiyatliroq qatnashayotganiga guvoh bo'lasiz. Umid qilamizki, sevimli jamoamiz mavsumning qolgan qismida ishonchli o'yin ko'rsatib biz muxlislarni xursand qiladi va uzoq kutilgan chempionlar ligasi yo'llanamasini barchamizga hadya qiladi. At the end of the storm there is a golden sky... You'll never walk alone! PS uff.uz sayti “qayta tug'ilganidan” ruhlanib, ushbu blogning faoliyatini qo'ldan kelgancha davom ettirishga bel bog'ladim. Tez orada ko'rishgancha!
— deya xabar beradi uff.uz nashri.